El programa va cuntar con convidaos como María Cotiello, Isasaweis o Hevia, entrevistaos alredor d’una botella Sidra d’Asturies

La televisión pública asturiana va estrenar esti miércoles 1 de mayu la segunda temporada del programa dedicáu a la cultura sidrera, Mundu Sidreru, presentáu pol periodista Inaciu Galán. 10 capítulos que van emitise nos meses vinientes coincidiendo con un periodu de recoyida de sofitos pa la candidatura de la Cultura Sidrera Asturiana a Patrimoniu Inmaterial de la Humanidá.

El programa va emitise los miércoles a les 22:15 hores, cunta cola collaboración de la DOP Sidra d’Asturies y va percorrer toles facetes de la Sidra d’Asturies, visitando llagares, chigres, eventos y falando coles persones que más saben de la bebida insignia de la cultura asturiana.

Cada programa inclúi una receta fecha con Sidra d’Asturies pol cocineru Lluis Nel Estrada, asina como un espaciu que mos enseña les razones que podríen facer a la Cultura Sidrera Asturiana, Patrimoniu Inmaterial de la Humanidá.

Como na primer temporada, cada programa va abrise con una entrevista con figures relevantes de la sociedá asturiana, alredor d’una botella y echando unos culinos n’espacios impactantes del paisaxe d’Asturies que se convierten en platós del programa.

El primer programa va cuntar cola actriz y presentadora María Cotiello, y a lo llargo de la temporada van pasar pel programa personalidaes como la youtuber Isaaweis, el gaiteru Hevia o la cantante Marisa Valle Roso.