Escudu de Yernes y Tameza
Escudu de Yernes y Tameza.

Yernes y Tameza ye unu de los conceyos más pequenos y desconocíos d’Asturies. El conceyu, qu’ocupa una superficie de 31,60 km², apenes cunta con 132 vecinos. Una cifra que foi menguando de forma casi constante dende la década de los 30, cuando algamó la so cota máxima de población con 892 habitantes.

L’escudu de Yernes y Tameza ta partíu horizontalmente y resume, n’esencia, la hestoria de les tierres qu’ocupa. Per un llau, el so pasáu eclesiásticu, representáu na Cruz de los Ánxeles de la parte cimera. El territoriu del conceyu dependió de la Ilesia hasta finales del sieglu XVI, cuando, tres la desamortización ordenada por Felipe II, los vecinos mercaron a la corona les tierres por 12.691.922 maravedís.

Na parte inferior del escudu de Yernes y Tameza, conceyu estrechamente venceyáu a l’agricultura y la ganadería, apaecen dos toros embistiéndose. Cunta la hestoria que foi d’esta manera como se delimitó la frontera del conceyu cola vecina Proaza. Asina, apautóse que dos toros, unu de cada xurisdicción, llucharíen pa fixar la llinia qu’estremaría dambos conceyos. La llende quedaría establecía nel puntu hasta onde llegara’l toru vencedor. En representación del conceyu compitió un exemplar de capa roxa del pueblu de Yernes. El toru tamezanu yera enforma menor en tamañu, como se reflexa nel escudu, pero resulto vencedor nel envite, quedando afitada la frontera col vecín conceyu de Proaza onde la conocemos anguaño.