El quesu Cabrales, el más caru del mundu nuna subasta

La pieza ganadora del últimu certamen d'esta variedá algamó na subasta'l valor de 20.500 euros

Quesu Cabrales
Bodegón de queso Cabrales (Cabrales)

Una pieza de quesu cabrales de dos kilos foi la ganadora del Certamen del Quesu de Cabrales 2019, celebráu cada primeru d’agostu. La pieza algamó na subasta’l valor de 20.500 euros. Foi’l preciu que pagó por él El Llagar de Colloto. El pagu supón un preciu de 10.250 euros el kilo. Constituye, asina, el quesu más caru de tol mundo por segundu añu consecutivu.

Anque esti tipu de quesu azul ye propiu, sobre too, del conceyu de Cabrales, tamién s’ellabora n’otres zones d’Asturies como nos pueblos Oceño, Rozagás y Cáraves, en Peñamellera Alta. Pa la so ellaboración, utilízase lleche cruda de dos ordeños (mañana y nueche), que pue ser una mezcla ente lleches de vaca, oveya y cabra. Cuanta más lleche de vaca, más mariellu será’l quesu.

El procesu de maduración dura ente dos y cuatro meses. Dase nes cueves naturales de los Picos d’Europa, onde la temperatura va dende los 8 graos a los 12, con una humedad del 90%. N’estes condiciones apaez un fungu tipu penicillium, culpable del color azul del quesu. Dende l’añu 1982, la ellaboración ta suxeta al Reglamento de la Denominación de Origen del Queso Cabrales, lo qu’obliga a los artesanos a axustase a procedimientos tradicionales y a la utilización esclusiva de lleches autóctones.