Videoxuegos, tecnoloxía, concursos, talleres, artesanía y solidaridá, pero, sobremanera, diversión. La Cometcon torna del vienres 3 al domingu 5 d’abril de 2020 con nuevu allugamientu. La octava edición de la convención d’ociu alternativu más grande del noroeste d’España va celebráse nel Recintu Ferial Luis Adaro de Xixón.

Fiel a la so vocación d’entretenimientu, la Cometcon cuenta anguaño con un ampliu dispositivu d’ociu dixital: consoles, simuladores, puestos de Realidá Dixital (VR) y ordenadores de sobremesa. Amás, venti desarrolladores independientes de videoxuegos van allegase p’amosar les sos creaciones convirtiéndola asina nuna de les mayores d’España a nivel de dotación d’equipos.

La organización apuesta fuerte anguaño por enfocase tamién a la I+D+i. Por eso va cuntar con AprenDev, un espaciu onde dalgunos de los nomes más importantes del panorama del desenvolvimientu del videoxuegu español van alcontrase colos asistentes al eventu y van compartir les sos conocencies: Arturo Monedero, Sara Tardón, Nadia García Díaz, Rocío Tomé… Una vertiente más práctica va ser l’espaciu CometMaker.

Gracies a la collaboración cola asociación OCEN, la Cometcon recupera los prestixosos premios nacionales de doblaxe ReTake, que van dexar esfrutar en Xixón de les voces de Scarlett Johansonn, Bob Esponxa y Benji, ente otros munchos personaxes y actores queríos pol gran públicu. Nun van faltar les tradiciones de la cita, como’l concursu de cosplay, les competiciones de videoxuegos, la esgrima y los xuegos de mesa. Na llínea más aventurera, va haber inclusive un ataque zombi nel Luis Adaro.

L’eventu tien en mente tamién la responsabilidá social. Asina, va favorecese la movilidá sostenible y les oenegés que collaboren col bientar de los más desfavorecidos, humanos o animales, van cuntar con un espaciu pa dar a conocer el so importante llabor. Ye reseñable tamién la gran acoyida comercial, la mayor de la so hestoria, con un total de 126 puestos: 54 estands comerciales de dolce comunidaes (d’Asturies, con tiendes de Xixón, Uviéu, Avilés y Mieres) y 72 artesanos veníos de toes partes d’España xuntu con una primer representación internacional, de México.

La entrada antemanada al eventu, con cola estremada, puede mercase per internet según nos distintos puntos de vienta físicos instalaos n’Uviéu, Xixón y Avilés y dexa acceder a tola Cometcon por tres euros. Esiste la posibilidá de mercar un abonu pa trés díes, que permite entrar toles vegaes que se deseye. Amás, los menores de cinco años nun abonen entrada y les mascotes tienen permitíu l’accesu al recintu.

Otru aspeutu destacable del eventu ye que les principales empreses de tresporte públicu, según grandes hoteles de la ciudá, ufierten descuentos p’allegar y pernoctar mientres la fin de selmana, tollo disponible dende la so web www.cometcon.es. Too esto ye namás un pequeñu avance de lo qu’aguarda en Xixón. Porque la Cometcon guárdase siempres daqué sorpresa y la cantidá d’actividaes ye tal que la esperiencia siempres ye distinta pa cada asistente. El que prueba, repite.

Más información: