Dende la estinción del frangüesos nel Parque Nacional de los Picos d’Europa fai unes siete décades, nun hubiera nenguna nacencia de pollu. Hasta agora. Asina lo constataron los técnicos de la Fundación para’l Caltenimientu del Frangüesos y la guardería del parque nacional, que lleven selmanes faciendo siguimientu del procesu reproductivu. La especie taba estinguida dende 1956.

Los padres del naciellu son dos exemplares adultos, llamaos Deva –una fema de 10 años, d’orixe pirenaicu, y reintroducida como pollu nel parque en 2010– y Casanova –un machu de siquier 13 años que llegó dende los Pirineos y establecióse en Picos d’Europa en 2013–. Formen pareya dende 2014.

La pareya llevaba 51 díes guarando nel interior del nial que primeramente habilitaren, nun resquiebru del macizu central del parque nacional, en territoriu asturianu. La confirmación d’esta nacencia nos Picos d’Europa, a 400 kilómetros de los Pirineos, supón un pasu bien importante pa la supervivencia al llargu plazu de la especie n’España.

Una pareya primeriza

La pasada seronda, el personal de la fundación pudo reparar nestos dos exemplares adultos comportamientos prereproductores como la defensa del territoriu, interacciones intraespecíficas, cópules repitíes y aportaciones de material de construcción del nial.

En xineru, los técnicos constataron cómo la pareya instalárase definitivamente nuna oquedad. Pocu dempués producióse la puesta del güevu y los adultos empezaron a guarar por relevos. Agora, los técnicos confirmen la nacencia gracies a un significativu cambéu nel comportamientu de los padres, que, ente otres coses, tán realizando les primeres cebes de la so cría.

Como l’ésitu reproductor de los frangüesos suel ser baxu, sobremanera en pareyes primerices como esta, l’equipu de la fundación, el personal técnicu y de guardería del Parque van caltener un siguimientu pormenorizáu de la evolución de too el procesu.Nel meyor de los escenarios, la fase de cría del nuevu pollu nel nial va enllargase siquier hasta xunu, cuando va tar preparáu pa volar. Sumaríase asina a los 24 frangüesos d’orixe pirenaicu que, gracies al proyectu de reintroducción, yá viven en llibertá nel cordal cantábricu.