Música, danza y teatru, esta selmana en Llaboral

Coque Malla va presentar les temes del so últimu trabayu, ¿Revolución?, nun ambiciosu y cuidáu espectáculu cola so banda

El Teatru de la Llaboral acueye esta fin de selmana’l conciertu de Coque Malla. L’artista llega’l vienres 24 de xineru, a les 21:00 hores, a Xixón cola so nueva xira, ¿Revolución Tour? L’artista va presentar les temes del so últimu trabayu, ¿Revolución?, nun ambiciosu y cuidáu espectáculu cola so banda. El pasáu mes d’ochobre publicaba’l so nuevu discu, col que llanza una entruga y una reflexón al so públicu. Esplica que nun ta llamando a les files de nengún llevantamientu, pero pregunta si ye posible una revolución. “Yo, la verdá, nun soi bien optimista al respeutu…”, afirma.

Trés compañíes emerxentes de danza contemporanea (les compañíes Fleten Dúo y Arantza Iglesias y la creadora Gloria Borge Lasarte) van actuar el sábadu 25 de xineru, a les 20:30 hores, nel marcu del proyectu Reunión en Danza (RED), un proyectu que nació en 2016 pa poner en contactu a coreógrafos, asociaciones, profesionales del sector y públicu y sofitar a nuevos ceadores. Xuntu con estes compañíes van actuar los baillarinos yá consagraos de la compañía Martin Krego, que van amosar la so pieza Zona non confort. La compañía Martin Krego va impartir amás el día enantes, a les 18:00 hores, un taller p’adultos y nuevos a partir de 14 años.

El públicu infantil y familiar va poder esfrutar de La loca historia de Frankenstein de ACAR Teatro del Mundo’l domingu 26 de xineru, a les 17:30 hores. Na obra Igor y Monstry lleguen al castiellu de la familia Frankenstein dempués d’un llargu viaxe en busca d’una fórmula que devuelva a la Doctora al so estáu natural. Anacelia Álvarez y Roca Suárez protagonicen esti espectáculu, dirixíu por Pep Vila, que recibió una Residencia de Producción del Programa d’Artes Escéniques en Residencia de la Llaboral.

Les entraes tán disponibles nos puntos de venta habituales: la Recepción de la Llaboral, el Centru Niemeyer n’Avilés, la Oficina d’Información Turística d’Asturies n’Uviéu/Uviéu y Entraes Liberbank.