“La historia de les nuestres güeles, tamién forma parte de la nuestra. Nun dexemos que s’escaezan les sos vivencies, les aventures, les penuries d’una guerra. Fala con to güela, escribi la so historia”. Asina presentó la marca asturiana Puru Remangu la so iniciativa #30DíesConRemangu, un proyectu abiertu y participativu que cada día d’esti mes publica una historia distinta d’una güelita; muyeres con unes vivencies úniques y irrepetibles que pueden lleese y vese nel perfil d’Instagram @Pururemangu. 

Aprender a montar en bici, viaxar a Venecia, emigrar a Francia, trabayar de carbonera o nuna fábrica de conserves, montar un cine na cuenca del Nalón… son parte de les histories d’Olvido, Saluda, Esther, Ángeles, Marina o Julia que yá se fueron publicando estos díes y, pesie a qu’entá falten más de la metá, yá tienen cientos de siguidores que cada día s’emocionen, comparten y esfruten lleendo sobre les vides d’estes muyeres que, ensin dulda, nun dexen indiferente a naide. La iniciativa sigue abierta a que cualquier persona que quiera unviar la so historia, pueda faelo al traviés del email pururemangu@gmail.com.

Feminismu y autoestima

Esta ye la segunda edición de #30DíesConRemangu, idea desendolcada por Puru Remangu en llínia col so oxetivu de nun ser namás una marca de ropa y dir más allá. D’esta manera, reivindicación del papel de la muyer, arguyu de lo propio y normalización llingüística -esta cuenta d’Instagram con más de 2.000 siguidores publica n’asturianu dafechu-, danse la mano cada mes de marzu. L’añu pasáu estos 30 díes tuvieron dedicaos a muyeres asturianes que destacaben nes sos carreres profesionales y agora céntrense nestes muyeres úniques que son les nuestres güeles.