La hestoria de la Llaboral, de monumentu franquista a ciudá de la cultura

El complexu nel edificiu de piedra más altu d’España y nel más altu, en xeneral, d’Asturies

La Universidá Llaboral de Xixón naz nos años 40, na inmediata posguerra, depués de qu’un accidente llaboral terminase cola vida de dellos mineros de la cuenca del Caudal. Tres el funeral de los mineros, Carlos Pinilla Turiño, subsecretariu del Ministeriu de Trabayu; Alejandro Pidal Guilhou; Álvaro Armada Ulloa, conde de Revillaxixéu; y Ricardo Heredia Guilhou, conde de Benahavís; so la direición de José María Fernández, reuniérsonse col envís de crear un orfanatu que acoyiera a les nueves xeneraciones de los mineros fallecíos n’accidentes llaborales. Primero, col nome de Fundación José Antonio Girón, quien yera’l ministru de Trabayu pol aquel entóncenes, y depués baxo’l nome d’Universidá Llaboral.

Nesti sen, desarrolláronse les distintes dependencies onde s’acoyerían los cerca de mil alumnos, xunto con una escuela, instalaciones deportives, talleres industriales, etc. Asina mesmo, cuntaba esti espaciu con una granxa qu’ocupaba cien hectárees. L’oxetivu yera crear una ciudá autosuficiente, zarrada sobre sí mesma, onde poder formar a una mocedá altamente cualificada pa la minería.

Vista de la Universidá Llaboral
Vista de la Universidá Llaboral dende’l Xardín Botánicu de Xixón.

Por embargu, al tiempu que se diba construyendo’l complexu, el Ministeriu de Trabayu ordenó la creación de les Universidaes Llaborales, que taríen destinaes a la formación profesional de la mocedá. Abandonóse’l proyeutu inicial y la Compañía de Xesús asumió la direición y la enseñanza nel centru, mientres que la Orden de les hermanes probes de Santa Clara, tamién nomaes les Clarises, tomaron el control de la intendencia. Sicasí, nel añu 1978, el personal docente fízose cola direición de la Universidá Llaboral, y nel 1996 les monxes clarises dexaron tamién el complexu.

Na década de los 80, l’edificiu foi parcialmente abandonáu cuando entamó a formar parte del Institutu Nacional d’Enseñances Integraes, lo que provocó una progresiva gastadura hasta que, nel añu 2001, pasó a les manes del Gobiernu d’Asturies. El nuevu plan del Executivu yera la creación d’un centru cultural con espacios pa deprender y enseñar, pal consumu de productos y actividaes culturales, pal intercambiu d’idees y conocimientu, etc. Asina, iniciáronse nueves obres nel añu 2005 y finalizáronse nel 2007, creando’l Centru d’Artes a partir de les antigües naves de formación profesional y una espléndida biblioteca; acoyiendo la sede de la Radiotelevisión del Principáu d’Asturies, el Centru Integráu de Formación Profesional, la Facultá de Comerciu, Turismu y Ciencies Sociales, el Conservatoriu Profesional de Música y Danza y la Escuela Superior d’Arte Dramáticu, ente otres coses.

Patiu del edificiu de la Universidá Llaboral de Xixón
Techu acristaláu del atriu corintiu que da accesu al patiu.

Debemos el diseñu de la Universidá Llaboral al arquitectu Luis Moya Blanco, quien la concebió según la estética clasicista. Lo primero que llama l’atención ye la estraña disposición de la entrada, la cuala ubícase opuesta a la ciudá de Xixón. La intención yera la mesma que col Partenón d’Atenes: que fuera necesario bordeala por completu pa apreciar la so belleza enantes d’entrar. Tol complexu estructúrase según el patiu central, que fae les funciones de plaza mayor de la ciudá. Aportamos a él tres pasar so una puerta de arcu, sobre el cual atopamos un escudu col águila de San Xuan y el xugu y fleches de los Reyes Católicos, adornáu, amás, con dos ánxeles.

A mano drecha tenemos el teatro, el cualu sigue los modelos helenísticos de la Puerta del Mercáu de Mileto, la Biblioteca d’Éfesu y las midías del mesmu Partenón d’Atenes. El cuerpu superior componse, per un llau, de columnes d’orde corintio, mientres qu’el interior ta formáu por columnes d’orde toscanu. El frontón del teatru ta coronáu por un gran escudu d’España. Na actualidá, acueye funciones de teatru (tanto de fora como de los alumnos de Escuela Superior d’Arte Dramático), conciertos y películes. La acústica del teatro, amás, ye d’altu nivel, potenciada mediante láminas de madera sobre fibra de vidru.

Vista del vieyu conventu de les Clarises na Universidá Llaboral, anguaño sede de la RTPA.
Vista del vieyu conventu de les Clarises, anguaño sede de la RTPA.

Frente a la entrada principal, destaca la ilesia, con una planta elíptica de 807 metros cuadraos que-y otorga el título de la mayor ilesia del mundu d’estes característiques, pensada nel iniciu pa acoyer a esos mil alumnos y docentes de los que falamos con anterioridá. Presenta, nel so interior, los mesmos elementos de las primeras basílicas cristianas de Roma (pesbiteriu, ambones, coru de cantores, galerías superiores etc.). Nel esterior, per otru llau, lluce una serie de estatuas y mosaicos, amás de pinturas que representen les distintes constelaciones del cielu, lo que destaca col estilu sombríu del interior.

Pa finar, la torre de la Universidá Llaboral, inspirada n’obres arquitectóniques como’l Faru d’Alexandría, la Xiralda de Sevilla y la Torre d’Hércules, mide en total 129,25 metros d’altura, amestándo-y la aguya de 20 metros que la corona. Estos rasgos convierten al complexu nel edificiu de piedra más altu d’España y nel más altu, en xeneral, d’Asturies. Sin dulda, merez la pena xubir hasta’l pisu más eleváu, contemplar los distintos azulexos, caún distintu del otru y pintaos a mano, y almirar los distintos edificios que constituyen el complexu de la Universidá Llaboral.