Güerres ufierta esta fin de selmana más de 1.500 quilos d’oricios

Rodrigo Cuevas va recibir l'Oriciu d'Honor mientres la IX Edición del popular evento gastronómicu, que va cuntar con Nacho Manzano como cocineru invitáu

Güerres yá lo tien too preparao pa celebrar la novena edición de los yá tradicionales Oricios. Un eventu que, col reclamu d’esti peculiar frutu del mar, axunta cultura, tradición y música en redol a la bona mesa. La comisión de festexos de la localidá colunguesa va disponer pa la ocasión más de 1.500 quilos d’esti demandáu equinodermu, que va poder tastiase crudu o cocíu, amás d’en tortielles y croquetes.

Tol pueblu va entornase, un añu más, na organización d’un eventu que va arrincar el sábadu cola salida, a los diez de la mañana, de la I Concentración motera Ástur-madrilana del oriciu. Dos hores dempués, al mediudía, va abrise’l recintu, qu’hasta les cuatro de la tarde va ufiertar non yá oricios y platos ellaboraos con esti manxar, sinón tou tipu de bébores y otres preparaciones pensaes pa los visitantes que prefieran tastiar otros platos. Enantes, poco dempués de la una de la tarde, ta programada una escursión al pedreru entamada pel Centru d’Interpretación de la Sierra del Sueve.

Clase maxistral de Nacho Manzano y verbena

El cocineru más galardonáu de la rexón, el parragués Nacho Manzano, va ser l’encargáu, a partir de les siete de la tarde, d’ufiertar una clase maxistral na que, como nun podría ser de otra forma, los oricios van ser los protagonistes. L’afamáu propietariu de Casa Marcial, primer y únicu restorán asturianu que consigue dos estrelles Michelín, va ponese al mandu de los fogones na Plaza de la Estadía pa sosprender al públicu coles sos propuestes.

Una hora antes, a les seis, van poder empezar a tastiase de nuevu los oricios. A partir de les once y media, la gastronomía va dexar pasu a la música cola celebración, un añu más, d’una verbena. La orquesta Versión Original va tar acompañada nel escenariu por un pinchadiscos. La fiesta va enllargase hasta bien entrada la madrugada.

Rodrigo Cuevas, Oriciu d’Honor 2020

La xornada del domingu va ufiertar más oricios, a partir de les dolce del mediudía, p’aquellos que prefieran esfrutar de la novena edición del certame gastronómicu’l primer día de marzu. A partir de la una de la tarde van empezar los actos protocolarios, que nesta ocasión van reconocer el llabor d’unu de los músicos asturianos más tresgresores. L’uvieín afincáu en Piloña Rodrigo Cuevas va ser reconocíu col Oriciu d’Honor 2020, una distinción que yá recibieron, ente otros, el futbolista Enrique Castro ‘Quini’, el Comité Organizador del Descensu del Sella, el programa de TPA Pueblos o’l restorán Casa Gerardo.

La Comisión de Festexos de Güerres reconoz, na figura de Cuevas, a un ‘axitador folclóricu’ que proxecta una imaxe d’Asturies fresca ya innovadora que se basa, ensin embargu, na tradición. Una tradición cola que l’artista, qu’acaba de presentar Manual de Cortejo xuntu al productor Raül Refree, va realcontrase, de la mano del oriciu, esti domingu nel conceyu de Colunga.