Santina de Cuadonga

Les obres d’acondicionamientu de la escampada de la basílica de Cuadonga van obligar a cortar la carretera d’accesu al Real Sitiu dende’l llunes próximu, 4 de mayu, hasta’l día 29. La interrupción del tráficu va producise na rotonda d’El Peregrino, que distribuye’l tráficu a Cuadonga y los llagos, mentes que l’accesu piatonal va caltenese abiertu.

La Conseyería d’Infraestructures, Mediu Ambiente y Cambéu Climáticu empecipió a primeros de payares de 2019 les obres na escampada, que suponen una inversión de 433.277 euros. L’actuación ta executándose según la planificación prevista, sacante la paralización obligada que se produció de resultes del confinamientu pola crisis sanitaria.

Los trabayos consisten na reposición del pavimentu en mal estáu dende la plaza de la basílica hasta l’empiezu del accesu piatonal a la Santa Cueva, incluyendo la zona de rodadura, la vía sacra y los aparcamientos asitiaos frente a les cases de los canónigos.

Nestes llabores utilícense los mesmos materiales qu’existen na actualidá, sacante na zona de tremáu asfálticu frente a les cases de los canónigos, que va sustituyise por piedra caliar Griotte. Nos díes últimos, concluyeron los trabayos nel pavimentu de cantu rodáu y agora ta trabayándose nel de lloses de piedra caliar.