El Guirria quier ser d’interés turísticu nacional

El Conceyu yá trabaya na ellaboración de la doble candidatura

Naide sabe a ciencia cierta cuándo empezó esta tradición. Nin siquier los más mayores del conceyu recuerden los oríxenes d’esta fiesta, pero lo cierto ye que’l percorríu de El Guirria peles cais de San Xuan de Beleño ye una de les imaxes más repetíes del Añu Nuevu n’Asturies. Agora, el Conceyu de Ponga quier convertir esta ancestral celebración en Bien d’Interés Cultural (BIC) inmaterial y fiesta d’interés turísticu nacional. Según publica’l diariu El Comerciu, l’alcaldesa del conceyu yá trabaya na doble candidatura.

La Fiesta d’El Guirria y del Aguilandu celébrase’l 1 de xineru na capital pongueta. El Guirria ye un mazcaráu mitolóxicu que percuerre’l pueblu achuchando, abrazando y besando a les muyeres qu’atopa pel camín. Failo escoltáu por homes a caballu. El papel interprétalu un mozu del conceyu. Mentanto, los aguilanderos van pidiendo poles cases al llombu de los caballos.