El #FormientuEnCasaFest amplía la so programación

El festival con creación cultural en llingua asturiana ye’l más llargu de los celebraos nel estáu nesti periodu de confinamientu

La plataforma formientu.com amplía la so programación per tercer vegada consecutiva hasta llegar hasta principios del mes de mayu. La publicación dixital de la revista Formientu entamó esti ciclu d’actos culturales el 18 de marzu, col entamu del estáu d’alarma. L’ampliación, que los sos entamadores bautizaron como tercer fola del #FormientuEnCasaFest tien llugar non solo pola bona acoyida del públicu, sinón pola multitú de propuestes que lleguen cada día a la organización del festival.

“No que va de confinamientu nun hai precedentes d’un festival per streaming que tuviere una duración similar nel estáu español y menos nuna llingua minorizada”, esplica Diego Solís. Amás, esti festival faise de forma altruista per parte de los artistes, como regalu a la sociedá y reivindicación a les alministraciones pa implicase nel sostimientu del trabayu del colectivu de creadores y de la ufierta cultural a la sociedá. “Esto amuesa non solo la vitalidá de la creación n’asturianu sinon el compromisu de los mesmos pa cola sociedá asturiana nun de los momentos más complicaos de la nuesa historia reciente”, esplica Inaciu Galán.

La programación inclúi nesta tercer fola a escritores, músicos, artistes plásticos, críticos lliterarios, filólogos, docentes, cuentacuentos, comunicadores o actores, ente otros perfiles.  Ente los nomes, los músicos Rodrigo Cuevas, Rubén Bada y l’ex de Los Berrones, Tante Blanco, les escritores Pilar Sánchez Vicente y Solinca Turbón, los comunicadores María Luz Pontón y Pedro Durán, ente otros.

Nel festival hai espaciu vegada más pa los creadores culturales llioneses, cola presencia d’una charra sobre la creación cultural en llionés por Daniel Guerra. El festival pon atención tamién a la reciella, con trés sesiones de llectura y cuentacuentos, con Maggy, Helena Trexu y Beatriz Rato Rionda, en dalgunos de los próximos sábados y domingos a les 12 la mañana. Casu llamativu va ser la charra de Matthew Stuckwisch, profesor universitariu estadounidense que deprendió asturianu va años y que falar de la so esperiencia  cola lliteratura y la llingua asturiana dende’l so país.

El programa completu va desendolcase hasta’l 3 de mayu, con actos tolos díes.

Llunes 20

Milio Ureta > Recital/Presentación > Poemes del Amor Simétricu.

Martes 21

Pilar Sánchez Vicente > Charra: Muyeres confinaes: del maltratu al sostén.

Miércoles 22

Vítor Suárez > Charra: Traduciendo a Clarín, esperiencia y dificultaes.

Xueves 23

Gonzalo Llamedo > Charra: Anovación educativa na universidá: dando blincos pola tresversalidá.

Vienres 24

Ástor Llaneza > Simbiosis: una hestoria de cooperación ente seres vivos

Sábadu 25

12:00. Maggy > Cuentacuentos pa la reciella.

19:00. Marcos Salázar > Pica-pica de cultura asturiana.

Domingu 26

Pedro Durán > Charra: Presente y futuru del audiovisual n’asturianu.

Llunes 27

Aymara González > Tallerín: Traducción al asturianu: conceptos y entamos.

Martes 28

Claudia Lueje > Charra: Dir de monte ensin salir de casa.

Miércoles 29

Daniel Guerra > Charra: Producción cultural en llionés.

Xueves 30

Matthew Stuckwisch  > Charra: Lliteratura y llingua asturiana dende los Estaos Xuníos.

Vienres 1

Rubén Bada > Conciertín

Sábadu 2

Mónica Jiménez > Charra: ¿Qué pintaben les muyeres asturianes? De lo llocal a lo global.

Domingu 3

María Luz Pontón > Charra: La tele de los escolinos, una esperiencia pionera de televisión n’asturianu.