El Camping de Ribeseya, premiu nacional al ‘Más Familiar’

Los Camping Naranjo de Bulnes d'Arenas de Cabrales y Las Gaviotas, de Castrillón, fueron finalistes n'otres dos categoríes

Camping Ribeseya

Ésitu de los campings asturianos na II edición de la Gala de Camping d’España qu’entama la Federación Española de Camping (FEEC) y que se celebró na nueche de del domingu en Madrid. El Camping de Ribesella llogró’l Premiu Nacional na categoría ‘Camping más familiar’ y el Camping Naranjo de Bulnes d’Arenas (Cabrales) y el Camping Las Gaviotas de Castrillón, fueron finalistes nacionales nes categoríes de ‘Meyor camping de monte’ y ‘Meyor restorán de camping’, respectivamente.

El presidente Otea, Jose Luis Álvarez Almeida, asistió a la ceremonia acompañáu pol presidente de l’asociación de camping d’Asturies, integrada en Otea, Ramón Alvarez. Tamién allegaron la conseyera de Turismu, Berta Piñán, l’alcalde de Ribeseya, Ramón Canal, y el conceyal de Turismu, José Luis Díaz Bermúdez.

La Gala de Campings d’España tien como oxetivu premiar la profesionalización que los empresarios d’esti sector tán llevando a cabu nos últimos años. Trátase del mayor eventu de referencia del sector del camping a nivel nacional. La consecución d’esta reconocencia amuesa l’altu nivel de los campings d’Asturies porque la competencia ye bien alta y hai n’España campings d’enforma nivel.