El banzáu de Tañes va ser navegable

El Gobiernu asturianu aprobó esti xueves el cambéu del decretu que regula les actividaes acuátiques d'usu públicu nel Parque Natural de Redes

El banzáu de Tañes va ser navegable
Vista del banzáu de Tañes. / Turismu Asturies

Lluz verde a una reivindicación de vecinos y hosteleros de la zona. El Gobiernu asturianu aprobó esti xueves el cambéu del decretu que regula les actividaes acuátiques d’usu públicu nel Parque Natural de Redes. El cambéu va permitir determinaes actividaes lúdiques y deportives nel banzáu de Tañes, allugáu nel espaciu protexíu.

El testu detalla les condiciones y los usos autorizaos, según les llimitaciones que siguen vixentes. Amás, apurre garantíes a la futura actividá lúdicu-deportiva venceyada al saléu recreativu, que compatibiliza’l desenvolvimientu socioeconómico de la zona cola preservación del mediu ambiente. La tramitación del nuevu decretu riquió la revisión de diverses instituciones y alministraciones como la Comisión d’Urbanismu y Ordenación del Territoriu (CUOTA), la Confederación Hidrográfica del Cantábricu y el Conseyu Consultivu.

El banzáu de Tañes ta asitiáu a unos cuatro kilómetros d’El Campu capital del conceyu de Casu, y de Rusecu capital de Sobrescobiu. La norma modificada va entrar a valir a otru día de la so publicación nel Boletín Oficial del Principáu (Bopa). A partir d’esi momentu, van ser les alministraciones competentes en materia d’agües y territoriu les encargaes d’autorizar específicamente los proyectos venceyaos a la nueva actividá.