Cuideiru
Vista del puertu de Cuideiru. / Pixabay

Cuideiru ye’l pueblu más guapu de tola mariña española. Asina lo decidieron los llectores de la revista Condé Nast Traveler. La publicación plantegó va unes selmanes una entruga a los sos siguidores: ¿cuál ye’l to pueblu favoritu de la mariña española? Y la respuesta foi atayante: Cuideiru. La villa de la mariña occidental asturiana conquista a propios y visitantes. La localidá supo caltener l’encantu marineru a lo llargo del tiempu.

El puertu y el coloríu de les sos cases encaramándose pela fastera converten el pueblu nuna parada obligatoria. Un conxuntu únicu qu’almirar dende los sos numberosos miradores o perdiéndose peles sos estreches cais. La villa cunta con una ventena de restaurantes, cifra que sorprende teniendo en cuenta que’l conceyu malapenes perpasa los 5.000 habitantes.

Nun ye la primer vegada que la revista reconoz la guapura de los paisaxes de la mariña occidental asturiana, que foi estremada como meyor destín nacional na XI edición de los Premios Condé Nast Traveler n’España. Estos galardones tán consideraos los más importantes del mundu de los viaxes, reconocen la excelencia nes diverses categoríes de la Gold list 2019.