El nuevu proyectu d’Acuto Xuegos llámase ‘¿Cuála ye? El xuegu de preguntes d’Asturies‘. El que va ser el primer xuegu de mesa n’asturianu, que tien como inspiración al clásicu ‘Trivial Pursuit’, ta acabante d’entamar la so campaña de micromecenalgu. L’oxetivu ye faer realidá un xuegu de conocimientu qu’empodere Asturies. Nel desarrollu del xuegu nel tableru y a lo llargu de cientos de preguntes en seis temátiques diferentes, van ponese a prueba los conocimientos sobre Asturies en tolos ámbetos.

Historia, Cultura, Llingua y Lliteratura, Xeografía y Conceyos, Ciencia y Naturaleza y Deportes y Entretenimientu… Les entrugues son frutu de la collaboración de persones con fondos conocimientos en dellos ámbetos sobre Asturies. Participen Bertu Ordiales, biólogu y escritor; Bertu Peña, etnógrafu, illustrador ya historiador; Dani García de la Cuesta, músicu ya investigador de la música asturiana; Laura Marcos, profesora, escritora y crítica lliteraria; Julio González Trabanco, filólogu y llibreru; Rafa R. Valdés, historiador, investigador y especialista en llingua asturiana; Rubén Magadán Cosío, historiador ya investigador; Victor Suárez, profesor y wikipedista; y SEMA, Sociedá Etnomotora Asturiana, entidá que tien estudiao con fondura’l xuegu y deporte asturianu.

Esisten delles maneres de participar na edición del xuegu que van dende l’alquisición d’un xuegu a dellos con un importante descuentu. La recaudación de la campaña de micromecenalgu va destinase pa cubrir parte de los gastos d’editar el xuegu, pagar los gastos d’unvíu y la comisión de Verkami por usar la so plataforma. El xuegu compónse d’un tableru de xuegu de 48×48 cm, 600 preguntes en 100 tarxetes, 24 fiches d’aciertu, dau y peones de xugadores.

‘¿Cuála ye? El xuegu de preguntes d’Asturies’ nun ye’l primer proyectu d’Acuto Xuegos. La iniciativa nació n’abril del añu pasáu pa la creación de xuegos y xuguetes n’asturianu. Dende entós espublizaron xuegos n’asturianu -dos d’ellos agotaos-, unu n’eonaviegu y otru en gallegu a traviés d’otra campaña de mecenalgu.