Dende los años ochenta la voz de Berta Piñán (Cañu, Cangues d’Onís,1963) ye imprescindible pa conocer y entender la lliteratura asturiana contemporánea. Miembru de númberu de l’Academia de la Llingua Asturiana y ganadora de cásique tolos premios lliterarios n’asturianu más prestixosos, como poeta foi traducida a numberoses llingües. Agora enfréntase a un nuevu retu, convertise na Conseyera de Cultura, Política Llingüística y Turismu d’un gobiernu al que llega con esperances y ganes de camudar les coses.

Un llugar pa perdese… La comarca de los Beyos, un llugar mediu remotu y a tiru piedra.

Un llugar pa vivir… Cangues d’Onís.

Un platu… L’arroz con pitu caleya.

Un postre… La compota de mazana de mio madre. Consigue que los cachos de mazana queden enteros y blandinos a la vez.

Una sablera pa pasar el día… La playa de Vega. En branu n’atapeciendo, n’iviernu, a cualesquier hora con marea baxa.

Un pueblín que nun podemos dexar de ver… Taranes, en Ponga. Ye un llugar impresionante y tien una lluz especial.

Un chigre pa tomar unos culinos… La Sifonería, enfrente de mio casa de Cangues. Pol tratu de Marga y Celsín, pol llugar cargáu d’hestories. Na mio cai de Madrid tamién hai un bar que se llama igual, ye bien prestosu y voi muncho. Lo que son les coses, los dos únicos llugares con esi nome y los dos téngolos al pie de casa.

Un parque natural pa visitar… El parque natural de Redes. Hai una carreterina que va dende L’Infiestu…

Una fiesta a la que nun faltar… El fin d’añu en San Xuan de Beleñu. Máxica.

Un muséu pa recomendar… El Muséu Etnográficu del Oriente d’Asturies, en Porrúa. Reconózome nesos cuartos modestos que representen la nuesa vida pasada. Amás, nel prau, hai un aguacate impresionante, que yá de por ello merez una visita.

Un momentu de la hestoria…  El día nel que celebremos la oficialidá del asturianu.

Un baille pa pasalo bien… El baille de la fiesta de Les Comadres, de la tertulia feminista que lleva esi nome. Lleva la mesma orquesta tocando 24 años y hai una simbiosis total colos gustos de les muyeres que mos xuntamos allí. ¡Ye divertidísimu!.

Una pallabra n’asturianu que te preste… Un axetivu: pindiu. Tolos praos de mio casa son pindios, asina que forma parte del mio adn per xeneraciones.

Una tradición que nun pue perdese… La sestaferia. Ye una espresión de la solidaridá, del valor del bien común. Y nun hai cosa que más pena dea nos pueblos que ver los caminos tomaos…

Una espresión n’asturianu que te preste… «Ye la cuenta», por exemplu: esi abrigu ye la cuenta pa ti, y «Bones nueches, mante».