Asturies, ente los destinos encamentaos por ‘New York Times’ pa 2020

El prestixosu rotativu estadounidense inclúi a la nuesa tierra nel puestu númberu 25 del so llistáu

Asturies sigue conquistando a viaxeros de tol mundu. Tantu, que la nuesa comunidá colóse ente los 52 destinos encamentaos pol New York Times pa visitar esti 2020. El prestixosu rotativu estadounidense inclúi la nuesa tierra nel puestu númberu 25 del so llistáu. La publicación destaca los praos verdes y sableres en formes de media lluna y encamienta conocer el nuesu paraísu enantes de la llegada de l’AVE en 2021, col consecuente aumentu de turistes que podría traer.

El llistáu recueye ente los sos encamientos otros dos destinos españoles: Menorca (41º), de la que destaca les sableres virxes y paraísos selvaxes, y el Valle d’Arán (42º), coles sos pistes d’esquí y pueblos medievales. El raking global de destinos destacaos pa esti 2020 ellaboráu por New York Times ta encabezáu pela ciudá de Washington. Ellí, va cien años, ratificóse la 19ª enmienda que dexó a les muyeres estadounidenses votar per primer vegada.