Pedro, Pikachu y Peter Pan, les 3 alpaques d’un hotel maliayu únicu n’España

Orixinaries de los Andes, nun tienen problemes p'adaptase al clima asturianu

Pedro, Pikachu y Peter Pan, les 3 alpaques d'un hotel maliayu únicu n'España

Esiste un hotel mui peculiar en Villaviciosa, nomáu Hotel 3 alpacas. N’él, por estraño que paeza, viven trés d’estos animales que-y dan nome. La pareya de ingleses, Jonathan Holden y Alla Varta, que tuvieron viviendo antes en Barcelona, treslladáronse al norte de la península en busca d’un terrén onde poder abrir un hotel. Pero nun queríen que fora un hotel cualquiera. Tres varios años de llucha burocrática, consiguieron un permisu p’acoyer les trés alpaques d’un criaderu de Cantabria. Estos animales, Pikachu, Peter Pan y Pedro, son el gran atractivu del hotel, únicu n’España.

Les alpaques, de mui diferente caráuter, lleven una vida tranquila nel hotel. Orixinaries de los Andes, nun tienen problemes p’adaptase al clima asturianu, yá que son animales qu’aguanten condiciones climátiques estremes, dende un periodu de calor hasta les xelaes típiques de la cordillera. Enantes de poder facer realidá’l so suañu, los dueños tuvieron qu’estudiar muncho pa poder facese cargu de les alpaques. Güei, por exemplu, esperen el momentu de trosquila-yos la llana y facer talleres con ello.

Pero los animales nun son l’únicu atractivu del hotel. Esti cuenta con siete habitaciones, cada una distinta de la anterior, con vistes al xardín y al campu. Cada una d’elles tien un bañu particular, hai wifi y aparcamientu gratuitos. Cuenta, tamién, con una biblioteca de clásicos lliterarios, historia local y arte. Amás, les vistes dende’l terrén dan a una zona de granxes y superficies de cultivu. Sin dulda, una auténtica esperiencia de l’Asturies más rural, xunío a la especial presencia de les alpaques nel prau.