8 bonos llibros ambientaos n’Asturies

Asturies ye tierra de lliteratura. N’asturianu o en castellán, son munchos los autores qu’escueyen la nuestra tierra p’ambientar les sos hestories. Estes son dalgunes recomendaciones pa esfrutar d’una tarde de llectura.

Xuan Bello, Hestoria universal de Paniceiros, 2002

Xuan Bello (Paniceiros, 1965), importante referente na lliteratura contemporánea asturiana con obres en versu y prosa, tráenos nesti llibru la so tierra natal, un pueblín de Tinéu nomáu Paniceiros, onde aspira a cuntanos la realidá por mediu de la mentira, reconstruyendo un universu enteru neste territoriu tan menudu. Nel llibru participen delles formes lliteraries que lu sitúen nun puntu inclasificable. Ente elles atopamos el rellatu, l’ensayu y l’artículu periodísticu. Toes estes formes ayuden a crear breves secuencies que producen una mirada parcial de la realidá, cuasi como un cuadru impresionista, con un tonu que les rellaciona. Si quies enllenate cola memoria d’un mundu cada vez más llonxanu, nun duldes n’echa-y una güeyada a esta obra tan peculiar, onde la memoria nos lleva hasta los llugares más insospechaos.

Pilar Sánchez Vicente, Gontrodo, la hija de la luna, 2005

Pilar Sánchez Vicente (Xixón, 1961), d’espíritu llibertariu y feminista, tráenos esta novela una narración histórica que recrea la vida de Gontrodo, una muyer de l’Asturies del sieglu XII que tien el so sepulcru nel Muséu Arqueolóxicu d’Asturies. Nel llibru, l’autora combina la realidá d’un remotu pasáu cola ficción pa danos a conocer la historia de Gontrodo, una noble asturiana concubina de Alfonso VII y madre de doña Urraca. El llibru reivindica’l papel de les muyeres na historia, una historia que quier escaecer a la metá de la humanidad. Gontrodo sobresal ente les muyeres del so rodiu tanto pola so intelixencia como pol so aspectu físicu (yera albina), con una narración en primer persona y una perimportante documentación que reflexa, amás, la vida cotidiana de la época.

Román Sanz Mouta, Benceno en la piel, 2020

Román Sanz Mouta, un autor nómada y amante de les metamorfosis, ofrécenos nesta trepidante historia un Xixón onde’l bencenu de Veriña guarda un secretu espeluznante: na realidá, el bencenu ye un virus maceráu dende va años nos furacos de les obres del Metrotrén. Esti virus, que nun paez tan relevante nun principiu, conseguirá semar el caos na ciudá. Un grupu d’aspirantes a escritores deberá facé-y frente y salvar la ciudá y la Semana Negra. L’autor, d’orixe gallegu y asturianu d’adopción, y con importantes influencies lovecraftianas, nun escatima n’humor nesta historia tan orixinal, una aventura que nun pues dexar de lleer.

Berta Piñán, La Tierra entero, 1996

Berta Piñán (Cañu, 1962), la tan conocida poeta asturiana, venceyada al sufitu de la llingua asturiana, tréanos nesti llibrín de cuentos una variedá tanto de narraciones breves como llargues, onde se pincela una visión cariñosa y, al mesmu tiempu dolorosa d’una realidá rural enllena de violencia cotidiana que derivada de les rellaciones humanes, de la sociedá y la convivencia, too ello dende una perspectiva cotidiana y realista.

Laura Castañón, La noche que no paró de llover, 2017

Laura Castañón (Revallines, 1961), tráenos nesta novela una narración d’engaños de la memoria y la construcción del pasáu. Valeria Santaclara lleva dende los 18 años atesorando una carta de la so hermana fallecida. Agora, yá con ochenta años, cuntará cola ayuda de Laia Vallverdú, una psicóloga qu’acaba d’aportar a Xixón, pa enfrentase a la abertura del sobre que-y quita’l sueñu. Feli, pel so llau, ye una moza que trabaya na residencia de Valeria que desea con toles sos fuercies escribir, pero la realidá ye otra bien distinta. Una historia de cuatro voces entretexíes y unes protagonistes que van cobrando fuercia a midía qu’avanza la historia.

Arantza Margolles, El crimen de ayer. Crónica negra asturiana (1900-1936), 2012

Arantza Margolles (Xixón, 1982), especialista en xenealoxía y collaboradora d’El Comercio, tráenos nesta obra una serie de histories novelaes que cunten los crímenes de la sociedá asturiana del primer terciu del sieglu XX, época onde los periódicos y revistes gráfiques comenzaron a publicar les primeres cróniques negres baxo’l títulu d’El crimen de ayer. Si yes un/a amante de les narraciones de crímenes y quies saber un poco más de la historia d’Asturies, nun puedes dexar de lleer esta recopilación de cuentos que alimentaron la imaxinación de los nuestros antepasaos.

Alfonso Zapico, La balada del norte, 2015

Esta vez falamos d’un cómic ambientáu n’Asturies nos años previos a la guerra civil. Alfonso Zapico (Blimea, 1981), ganador de numberosos premios, illústranos el regresu de Tristán Valdivia al norte para morrer, pero la situación dará un xiru cola apaición de Ibáñez, reporteru d’un periódicu obreru y Flora, una moza carbonera contratada como camarera que se convertirá nel ánxel de la guarda. Con una mirada a la realidá d’un pasáu que paez cada vez más escaecíu, recrea unos tiempos convulsos y de grandes desigualdaes, nuna época onde comienza a xestase la Revolución d’Asturies de 1934.

Antón Gardía, Díes de muncho, 1998

Antón García (Tuña, 1960), llicenciáu en filoloxía española pola Universidá d’Uviéu, tráenos con esti llibru la historia de Falín, que regresa a Grandiella depués de venti años. Col so regresu, abrirá la memoria pa recordar l’últimu añu que vivió nel pueblu y los acontecimientos tráxicos que camudaron la so vida y que lu obligaron a migrar. Nesta novela, que ganó’l XVIII Premiu Xosefa de Xovellanos de 1997, reconócense munchos de los llectores que ven reflexadas las sos propias vivencias na historia de Falín. Una historia que pertenez a munches y munchos asturianos dende que tenemos memoria.