Concursu Yes Youtuber!: porque en youtube tamién se fala asturianu.

La canal PlayPresta y la productora Cuatro Gotes Producciones  tán acabante convocar el concursu ¡Yes youtuber! de youtubers n’asturianu, p’afalar y visibilizar l’usu del asturianu en toa triba de videos en formatu de programes per internet. La canal quier descubrir y dar a conocer talentos nuevos qu’apaecen ente la mocedá y tamién ente la xente d’otres edaes.

Solo necesites 5 minutos y el concursu ta abiertu a toles propuestes posibles, dende opinión a entretenimientu, pasando per videotutoriales, telerealidá, ficción y otres propuestes nueves o formatos recuperaos y adaptaos al mediu dixital.

El concursu tien estayes escolares, de mocedá y d’adultos, con premios en toes elles, ente los que ta la grabación d’una temporada completa con medios profesionales nes instalaciones de Cuatro Gotes Producciones o nel centru educativu participante, llotes de productos culturales n’asturianu, asina como 150 euros pal casu de los premios p’adultos

Amás, la plataforma PlayPresta tien previsto organizar actividaes de difusión y visibilización de los proyecos presentaos n’institutos y eventos culturales.

El xuráu, formáu pol equipu técnicu de PlayPresta, presentadores de la canal y otres persones venceyaes al audiovisual asturianu y a la normalización llingüística, van valorase la calidá de los conteníos, l’inxeniu y la orixinalidá. Nun se tendrá en cuenta la calidá técnica de forma preminente, pero sí la calidá llingüística del asturianu utilizáu (a nivel fonéticu, léxicu, sintácticu, etc.), asina como l’interés normalizador y la potencialidá pa llegar a la mocedá de la propuesta. Van valorase tamién les dotes interpretatives o comunicatives y l’aprovechamientu de los recursos propios del llinguaxe audiovisual y la so capacidá d’incidencia nel públicu.

El plazu pa inscribir los videos nel concursu ¡Yes youtuber! ye hasta’l 15 d’abril del 2019 a les 23.59  h. y la participación ta abierta al ámbitu internacional y ye de baldre.  Les persones participantes tienen d’inscribise al traviés del formulariu que figura na web www.playpresta.com/yesyoutuberCada autor o autora, individual o colectivu, pue inscribir tantos videos como quiera. Nel momentu de la inscripción l’autor o autora tien d’escoyer la categoría na que quier inscribise.

¿Anímeste?