Yá hai candidatos pal XI Premiu al meyor cantar. ¡Descúbrilos!

www.xurde.net

Lafu y Rebeca, Los Berrones, Xaime Martínez y la Banda de Gaites el Trasno, candidatos al XI Premiu al Meyor Cantar

La entrega del gallardón, depués de l’actuación de los cuatro finalistes, va celebrase’l 26 d’abril nel Nuevu Teatru de la Felguera.

Llangréu va acoyer el vienres 26 d’abril la décimo primer edición del Premiu al Meyor Cantar. El Nuevu Teatru de la Felguera va ser l’escenariu onde los cuatro finalistes van actuar pa que’l xuráu, formáu por especialistaes en música y llingua asturiana, decida’l cantar ganador.

Tres una primer deliberación el xuráu, aconceyáu’l miércoles 3 d’abril nes  dependencies de la Dirección Xeneral de Planificación Llingüística y Normalización, realizó la selección de los cuatro cantares candidatos pa la final. Los intérpretes de los cuatro cantares finalistes son: Lafu y Rebeca, Los Berrones, Xaime Martínez y la Banda de Gaites el Trasno, toos ellos con trabayos discográficos editaos nos años 2017 y/o 2018. Na gala, que va emitise en TPA, tamién va ufrise un conciertu de Luis Nuñez y los Folganzanes, grupu ganador de la edición anterior del Premiu coll tema «La ñeve y la esmeralda».

El Premiu al Meyor Cantar convócalu’l Gobiernu del Principáu d’Asturies col oxetivu de consolidar, prestixar y arriquecer la creación musical tanto n’asturianu como en gallego-asturianu. Equí tienes los cuatro finalites: 

Lafu y Rebeca, con «Les sombres sobre la yerba» (lletra y música: Alejandro Lafuente)

Lafu y Rebeca (Alejandro Lafuente y Rebeca Velasco) lleguen a la final del Premiu al Meyor Cantar con una tema del añu 2017, «-Les sombres sobre la yerba». Na so carrera musical destaquen los discos Amor Amigo y Nun pido más, con esti discu Robeca Velasco recibió’l Premiu Amas al meyor cantante d’Asturies.

 

Los Berrones, con ¿Esto pa que val?» (lletra Ramón Blanco y música: Olegario Méndez)

Esti grupu, fundáu en en Tolivia (Llaviana) por Ramón Blanco y Olegario Méndez, debuta musicalmente en 1987  con un single de dos cantares ”Nun yes tu” y “Tais de yogur“. Ótros títulos de la so discografía son: Voi dicíteloSi rompe, que rompaLo tuyo como yeNo, home, nonDa-y fuerteAd libitum , etc.

¿Ónde vas con eses traces? ye’l so últimu trabayu nel qu’apaez el tema «¿Esto pa que val?» finalista del Premiu al Meyor Cantar.

Como premios algamaos destaquen el Amas Honoríficu en 2013 y otru otorgáu pola SGAE en 2004.

Xaime Martínez, con «Discursu de Belarmino Tomás ente los soldaos mentes camina sobre les agües del ríu Nalón» (letra y música: Xaime Martínez)

Escritor, filólogu y músicu de pop, asoleyó dos discos col grupu d’artfolk La Bande: La llamada del hombre ciervo Un cadáver exquisito.

Ósculos d’agua nel Imperiu Asturianu, nel que figura’l tema finalista del Premiu al Meyor Cantar «Discursu de Belarmino Tomás ente los soldaos mentes camina sobre les agües del ríu Nalón», ye’l so primer llibru-discu en solitariu.

La Banda del Trasno, con «Oldenburg» (lletra y música: Kike Dembinsky)

Esta banda ñaz nel añu 1999 na escuela de Música Tradicional de Cuaña, ta conformada por una ventena de componentes. Los integrantes d’El Trasno son alumnos de los hermanos José Manuel y Javier Tejedor, músicu que ye’l director de la banda cuañesa.

Nel añu 2013 graben el so primer discu Axeitín; con un tema d’esta grabación, Volviche, del poeta Xosé Fernandez Súarez consiguen el premiu AMAS al meyor cantar folk y el premiu al Meyor Cantar 2014.

Esta vegada, el cantar «Oldenburg» clasifícase ente los cuatro cantares finalistes de la XI edición del Premiu al Meyor Cantar.