Xune Elipe: «Prestaríame vivir unu de los momentos nos qu’Asturies garró les riendes del so devenir»

CONOCER ASTURIES CON… XUNE ELIPE

Llámase Xulio Andrés Elipe Raposo pero tol mundu lu conoz como Xune. Ñacíu n’Avilés en 1962, Xune Elipe ye cantante, presentador de radio y televisión y productor discográficu, pero sobre manera ye l’alma y la voz del que quiciabes ye’l grupu de rock más conocíu d’Asturies, Dixebra, que cumplió en 2018 trés décades faciendo rock n’asturianu sobre los escenarios.

Un llugar pa perdese una fin de selmana… Una travesía pela sierra de Cuera, escomenzando pel conceyu de Llanes y acabando nel de Cabrales.

Un llugar pa vivir… Asturies ye un país mui afayadizu.

Un platu… ¿¡Unu solu!? Pote de berces (si ye con castañes meyor).

Un postre… Ta claro, ye tiempu de frixuelos…

Una sablera pa pasar el día… La Tayada, una playina «virxe» ente les de Palombina y Borizu, en Celoriu (Llanes).

Un pueblín que nun podemos dexar de ver… Por supuestu, Porrúa (Llanes), pol paisaxe y el paisanaxe.

Un chigre pa tomar unos culinos… Casa Serafín en Vetusta (Uviéu), caltién l’espíritu de les sidreríes de siempre, el tratu ye candial y traten perbién la sidra.

Un parque natural pa visitar… D’Asturies cualquiera, por dicir ún el de Somiedu, les sos brañes colos teitos ye dalgo que tou asturianu/a debería conocer.

Una fiesta a la que nun faltar… Yo soi más de festivales, pero habiendo prau, sidra y collacios dame igual una qu’otra.

Un muséu pa recomendar… El Muśeu Etnográficu del Oriente d’Asturias en Porrúa. El llugar onde ta asitiáu (barriu de Llacín), el conxuntu arquitectónicu, les pieces espuestes, la so filosofía… esplica amañosamente cómo yera l’Asturies d’antaño y d’ónde venimos.

Un momentu de la hestoria que te prestaría vivir… La revuelta de Gonzálo Peláez, el 25 de mayu de 1808, la Revolución d’Ochobre, el Conseyu Soberanu… cualquiera nos qu’Asturies se fixo dueña de sí mesma y garró les riendes del so devenir.

Un baille pa pasalo bien… El baille y yo tamos reñíos, pero onde tea un bon pogu…

Una pallabra n’asturianu que te preste… Polo que representa na mio trayectoria personal nun pue ser otra que «dixebra». Amás, aparte del so significáu, creo que tien una sonoridá mui potente.

Una tradición que nun pue perdese… Toes aquelles que valgan pa reafirmanos colectivamente (n’Asturies hai bien d’elles).

Una espresión n’asturianu que te preste… «Al altu la lleva», dicir les coses d’esa manera (metafóricamente falando) ye dalgo qu’ultimamente yá nun facemos nesti país y asina nos va.