CONOCER ASTURIES CON… XUAN BELLO

Güei falamos con Xuan Bello, una de les voces poétiques más importantes de la lliteratura contemporánea, quiciabes la más conocida y traducida a otres llingües del mundu. Poeta de Paniceiros, Tineú, articulista, narrador, traductor y primer Premiu Nacional de Lliteratura Asturiana, comparte con nós delles de les sos querencies pa Conocer Asturies de la so mano.

Un llugar pa perdese una fin de selmana… ¿N’Asturies? Amieva, Bual, Allande… Fuera d’Asturies, ensin dexar de falar n’asturianu, tamién los hai cuasi tan intensos: el Bierzu, Cabreira, Sendín…

Un llugar pa vivir… Cualesquiera de los que dixi, pero tamién onde vivo, en Caces.

Un platu… El bacaláu con nata, que deprendí a facer en Portugal, y que Milio’l del Nido recoyó nun recetariu como «Bacalao a la moda de Paniceiros». Tamién se puede facer con una cremina de puerros y quesu, y ta mui rico, pero eso yá ye «a la manera de Turón».

Un postre… Nun soi mui llambión pa los postres. Quiero más el quesu: el del Beyu ye escepcional, y si d’Afuega’l Pitu falamos el de Ca Sanchu de Grau ye increíble.

Una sablera pa pasar el día… La sablera de Barayu, ente Valdés y Navia, ye pa pasar una vida.

Un pueblín que nun podemos dexar de ver… Empiezo pol míu, que ye Paniceiros, pero hailos escepcionales: Castriyón, en Bual ye un sitiu onde yo voi munches vegaes. O Pen, n’Amieva. O Vil.lanueva de Teberga… que sió. Por citar a un clásicu hispanoamericanu, «Plural ha sido la secreta / historia de mi corazón».

Un chigre pa tomar unos culinos… Cuasi nun prebo la sidra, soi de Tinéu y repunante, pero gústame muncho dir pel chigre que la familia Trabanco en Llavandera (Xixón) a compartir cola familia y los amigos esa allegría inmensa de siguir siendo.

Un parque natural pa visitar… El de Somiedu: pol paisaxe, sí, pero fundamentalmente porque pa min nun ye un parque natural: son les brañes de los mios mayores.

Una fiesta a la que nun faltar… San Roque de Tinéu ye obligao dicilo, anque tamién aviso que nun falto al Carme de Cangas.

Un muséu pa recomendar… El Muséu de Belles Artes d’Asturies, que necesita de munchos apoyos (sobre manera de la sociedá civil)

Un momentu de la hestoria que te prestaría vivir… ¿De la hestoria? Nun sé… de la lliteratura sí: el momentu en qu’Ulises abre los güeyos y descubre la belleza arrebatada de Nausicaa.

Un baille pa pasalo bien… El fox trot, siempre que lo toque na mio memoria Polo’l Curdioneiru.

Una pallabra n’asturianu que te preste… Lo primero que tien que deprender un poeta —por acasu, soilo— ye que nun hai pallabres que presten más qu’otres. La pallabra seronda, por exemplu, nun ye más guapa que la pallabra mierda. Les dos son útiles.

Una tradición que nun pue perdese… Nun hai tradición que nun se pueda perder.

Tags: