Xixón ye la ciudá del norte peninsular na que más medra’l turismu


El númberu de turistes en payares foi de 29.936, un 4,8% más que nel mesmu mes de 2017

Los datos oficiales espublizaos güei pol Institutu Nacional d’Estadística (INE) señalen que la cifra total de viaxeros agospiaos n’establecimientos hoteleros de Xixón nel mes de payares foi de 29.936 persones. Con una estancia media de 1,8 nueches, esto representa un total de 52.940 nueches d’agospiu.

La cifra de viaxeros medra un +4,8% respeuto al mesmu mes del añu caberu. L’incrementu más bultable rexístrase nel mercáu estranxeru, yá que la cifra asciende a 4.438 persones (1.793 más que l’añu caberu, un 67,8% más).

Acumuláu xineru-payares

No que cinca a los datos acumulaos del añu, la cifra total de viaxeros agospiaos n’establecimientos hoteleros de Xixón ente xineru y payares ye de 412.128 persones, con una estancia media de 2,0 nueches, que se traducen nun total de 820.109 nueches d’agospiu.

La cifra de viaxeros anguaño medra un +3,4% respeuto al mesmu periodu del añu pasáu. L’incrementu más bultable rexístrase nel mercáu estranxeru, yá que la cifra algama los 70.668 turistes, 17.490 más que l’añu caberu, un 32,9% más.

Xixón ye la ciudá que más crez en tol norte peninsular y la única, xunto coles capitales vasques, que rexistra un resultáu positivu.

No tocante a la cifra de nueches d’agospiu totales, l’incrementu respeuto a los once primeros meses del añu pasáu ye del +3,4%. Esti datu tamién ye’l más eleváu de tol norte peninsular.

Tags: