in

Víctor Manuel va tar esti miércoles nel programa Mundu Sidreru de TPA

Inaciu Galán va entrevistar a Víctor Manuel alredor d’una botella Sidra d’Asturies na selmana na que’l cantante cumple 72 años

La televisión pública asturiana (TPA) va rematar esti miércoles 3 de xunetu a les 22:15 la segunda temporada del programa dedicáu a la cultura sidrera, Mundu Sidreru, presentáu pol periodista Inaciu Galán. Nesti capítulu especial, que va a tener una duracion superior a l’habitual, el programa viaxa hasta Madrid pa conocer cómo vive la cultura Sidrera la comunidá asturiana presente nesta ciudá y pa entrevista al cantautor asturianu Víctor Manuel.

La entrevista tuvo llugar na Quinta Asturias, espaciu que’l Centru Asturianu de Madrid tien na redolada de la ciudá y onde xunto a un horru, Inaciu Galán va charrar con Víctor Manuel de la so carrera musical, de cómo vive la so rellación cola música asturiana y por supuestu de la Sidra d’Asturies. Un percorríu que s’allarga más de lo habitual nesta sección del programa teniendo en cuenta la relevancia de Víctor Manuel y el momentu nel que se fai, que coincide cola selmana na que’l cantautor de Mieres cumple 72 años.

Nel capítulu hai tiempu tamién pa conocer a sidreros auténticos ente la emigración asturiana en Madrid. Un grupu de miembros del Centru Asturianu de Madrid que van recibir al programa nel llar de la entidá na cai Fuencarral, onde tienen chigre y onde viven con muncha intensidá la cultura sidrera asturiana.

Esti Mundu Sidreru tien amás un momentu pa conocer a los ganadores a la meyor Sidra d’Asturies del añu 2019 y meyor productor de mazana dientro de la DOP. Amás, Inaciu Galán vuelve a enfrentase al retu de facer el degüelle d’una sidra brut nel llagar d’El Gaitero, visitando les sos hestóriques instalaciones.

Mundu Sidreru remata asina la so segunda temporada que con diez capítulos nos que punxo’l güeyu nel avance candidatura de la Cultura Sidrera Asturiana a Patrimoniu Inmaterial de la Humanidá, asina como na importancia del Productu de proximidá que supón la Sidra d’Asturies, visitando llagares, chigres, eventos y falando coles persones que más saben de la bebida insignia de la cultura asturiana. Pel programa pasaron esta temporada María Cotiello, Isaaweis, Hevia, Marisa Valle Roso, Arantxa Nieto, Nando Agüeros y Vicente Díaz, ente otres figures.

Xixón celebra l'Arguyu

Xixón celebra l’Arguyu

Nacho Vegas

Nacho Vegas va actuar nel Xardín Botánicu de Xixón en setiembre