in

V Salón d’agroalimentación y turismu del Arcu Atlánticu

Un grupu de productores de les rexones atlántiques españoles va ufiertar los sos productos onde’l Puertu Deportivu del 21 al 30 de xunetu.

Embutíos, conserves, pastelería, cerveza artesano, quesos, tartes y empanaes, platos ellaboraos, panadería, xeladería, productos típicos vascos… 17 productores qu’aporten d’Asturies, Galicia, Cantabria y Euskadi van afayase del 21 al 30 de xunetu na cai Claudio Alvargonzález, nel Puertu Deportivu de Xixón y van ufiertar les sos especialidaes, que son una amuesa de la meyor gastronomía del Arcu Atlánticu.

Demientres estos 10 díes, los espositores van ufiertar los sos productos a la venta y en formatu de preba pa que los visitantes puean conocer y consumir estos ‘bocaos atlánticos’. L’horariu d’apertura sedrá de 12 a 15h y de 17 a 23h tolos díes.

Sobre’l VI Festival Arcu Atlánticu

El V Salón d’Agroalimentación y Turismu del Arcu Atlánticu ta dientro del VI Festival Arcu Atlánticu, que se desendolca del 25 al 30 de xunetu na ciudá asturiana. Esti festival sirve como venceyu y plataforma d’intercambiu ente los pueblos que conformen l’Arcu Atlánticu européu. El mar, la naturaleza, la lliteratura, les artes escéniques, les artes plástiques, la música y la gastronomía espárdense pelos espacios y escenarios afitaos nes cais y places del centru de Xixón, na zona del Puertu Deportivu y el barriu históricu de Cimavilla, col oxetivu de potenciar la cultura atlántica. Anguaño, el festival, nel que participen tolos países del Arcu, dedícase a les llingües minorizaes: occitanu, asturianu/mirandés, euskera, bretón y gallegu.

Sergio Ortiz, Roberto Terradillos y David Menéndez, Premiu “Sabores del Arcu Atlánticu 2017”

‘Pasaporte romanu’ pa celebrar el Día de la Ruta de la Plata en Xixón