Un fin de selmana de cine

0
4

Cine, cine y más cine. Asturies entera somórguiase na selmana del Festival Internacional de Cine de Xixón (FICX) con una programación que va centrar l’actividá esta fin de selmana. Y nun lo va faer namá nes pantalles de la villa de Xovellanos. El Centru Niemeyer acueye estos díes la proyección de dos documentales nel marcu del certame xixonés. Las edades sensibles a la luz (2019) este mismo jueves y Piazzolla: Los años del tiburón (2018), el vienres van poder vese na Sala Cine del equipamientu avilesín.

Tamién va haber cine en Ribeseya y Cangas. En produciéndose un gran derrumbe nuna mina, Daniel queda atrapáu al pie de un grupu de compañeros nel buecu d’una galería a 600 metros de fondura. Nun tarden n’asimilar que s’atopen solos y que tendrán de ser ellos mesmos los que van tener que poner tolos medios para atopar una forma de salir. Ye l’argumentu de Enterrados, que va poder vese’l vienres a les 20 hores na Casa de Cultura riosellana y el mesmu día a la mesma hora nel cangués Teatru Toreno.

Alfredo González va poner banda sonora a tardar del vienres en Xixón. Dende la primer vegada que se xubió a un escenariu, la so carrera nun fixo sinón crecer. En 2018 el so cantar La nada y tu, perteneciente al so sestu discu, Afluentes, foi escoyida como la novena meyor cantar de la hestoria de la música n’asturianu. Va tar nel Centru Municipal Integráu L’Arena a les 19:30 hores. La entrada ye gratuita.

Y más música n’Avilés, onde Perlla Batalla, compositora, cantante y arreglista, y nomada a los Grammy y cantante acompañante de Leonard Cohen mientres más de diez años va tar nel Centru Niemeyer. Un conciertu nel que Batalla va compartir los cantares menos conocíos de Cohen p’averar la so obra a un públicu más nuevu. El vienres a les 22:30 hores. Les entraes tán a la venta a un preciu de 18 euros.

Amás, la soprano asturiana Ana Nebot va marcar el ritmu nel Rural Jazz Festival de Tolivia col so conciertu París era una fiesta (20 hores). Mui cerca d’ellí, na Casa de Cultura de La Pola Llaviana, va representase la obra La maldición de la pita roxa. La obra va dar empiezu a les 20:00 hores. Va ser tamién una tarde de teatru en Castrillón. El Centru Cultural Valey va acoyer, a la mesma hora, la representación de Shakespeare en Berlín. Les entraes tán a la vienta a un preciu de 13 euros (8 euros antemanada).

Uviéu va sonar a ópera. El Teatru Campoamor acueye Un ballo in maschera. Con música de Guiseppe Verdi y llibretu d’Antonio Somma, basáu en Gustave III ou Le Bal masqué de Eugène Scribe, trátase d’un melodrama en trés actos. Va haber representaciones vienres (20 hores) y sábadu (19 hores). Les entraes tán a la vienta a un preciu que bazcuya entre los 46 y los 171 euros.

Y na Cuevona d’Ardines, Monólogos de ciencia. Mientres l’espectáculu, que consta de dellos monólogos de distintes disciplines científiques, esta panda de frikis incomprendíos de sópitu conviértense n’héroes. Camuflándose entre música, cuentos y rises van desentrañando los misterios de la ciencia. El sábadu a les 20 hores. Les entraes tienen un preciu de 6 euros (4 euros para socios del Club Cultura).

Pela so parte, el Nuevu Teatru de La Felguera va acoyer el sábadu a les 20:15 hores la representación de la obra ¿Quién es el señor Schmitt?, de Sébastien Thiéry. El señor y la señora Carnero cenen tranquilamente na so casa, cuando de secute suena’l teléfonu. Pero los Carnero nun tienen teléfonu. El misteriosu interlocutor aportuna en falar con un tal señor Schmitt… Y lo que ye más estrañu entá, los Carnero afayen que tán zarraos nuna casa que nun paez la so casa, los cuadros camudaron, los llibros nun son los sos llibros, la ropa de los sos armarios nun-yos pertenez. La llerza apodérase de too.

Nel apartáu gastronómicu, les cogordes siguen siendo protagonistes en bona parte de la comunidá. Los valles del Caudal y del Nalón, les contornes del Nora y del Avilés y el Cabu Peñes entá celebren xornaes gastronómiques con esti manxar serondiegu como ingrediente principal. Xixón pieslla esta fin de selmana’l so campeonatu de pinchos y en Llanes siguen esfrutando al calor de la fabada, les fabes y les verdines. Otru platu de lo más tradicional, los tortos, centren les xornaes gastronómiques que cierren edición esti domingu en Siero.

Y los más pequenos de la casa van poder esfrutar a lo grande en Mercapeques. La plaza Cubierta de La Pola Siero va acoyer sábadu y domingu esta feria infantil con talleres, enchibles, baille, maxa, zona de xuegos, espaciu market, circuitu de crawlers, zona food and drink y muncho más. Horariu: de 11:30 a 14:30 y de 16:30 a 20:30 hores.