Los trenes turísticos entamen les sos rutes per Asturies
Los trenes turísticos entamen les sos rutes per Asturies

El proyectu Trenes turísticos d’Asturies realizó esti sábadu’l so primer trayectu. El percorríu partió de Xixón pa cubrir la ruta Puertos y cantiles. Ye una de les rutes que forma parte de la iniciativa impulsada pol Executivu autonómicu y Renfe. L’oxetivu de promocionar l’usu del ferrocarril como mediu de tresporte sostenible y les actividaes culturales, turístiques y sociales del Principáu.

La ruta Puertos y cantiles va tener una segunda edición el día 10 d’agostu. Percorre’l cabu Peñes y Candás, facer parada nel mirador del Espíritu Santu, en Muros de Nalón, y rematar con un paséu en Cuideiru, antes de tornar a Xixón. La próxima salida va corresponder a la Ruta de la sidra y los dinosaurios, el 20 de xunetu dende Uviéu. Inclúi visites al Muséu del Xurásicu d’Asturies (MUJA), según a equipamientos ya instalaciones rellacionaes cola cultura sidrera, tanto en Villaviciosa como en Nava. Va tener parada, coles mesmes, en Les Arriondes. La segunda sesión d’esti percorríu ta prevista’l 24 d’agostu.

La ruta La biosfera y la mina, que va conectar Xixón col Parque Natural de Redes, va desenvolvese los díes 27 de xunetu y 17 d’agostu ya inclúi una parada en La Pola Llaviana y una visita al Muséu de la Minería y l’Industria, n’El Entrego.

El Principáu financia parte del proyectu y empresta sofitu técnicu a la compañía pal diseñu de les rutes

El Gobiernu d’Asturies y Renfe roblaron un alcuerdu’l pasáu xunu pol que’l Principáu financia parte del proyectu y empresta sofitu técnicu a la compañía pal diseñu de les rutes. Pela so parte, la empresa ferroviaria asume les obligaciones y responsabilidaes del tresporte de viaxeros y contrata los autobuses pa complementar cada itinerariu.

El preciu pa cada ruta ye de 45 euros por adultu, con tarifa amenorgada de 20 euros pa menores de 4 a 13 años. En total, va haber 600 places disponibles, 100 por cada ruta y salida. Pa la promoción y comercialización d’estos productos, Renfe cunta col portal de viaje www.renfe.com/trenesturisticos.