Miriam Rodríguez y el show de Mota, Segura y Florentino, na Llaboral

Miriam Rodríguez
Miriam Rodríguez

El Teatru de la Llaboral de Xixón acueye esta selmana’l conciertu de Miriam Rodríguez y el show de ‘Dos tontos y yo‘ con José Mota, Santiago Segura y Florentino Fernández. Esti vienres 17 de mayu, a les 21:00 hores, el tour Contigo de Miriam Rodríguez visitará la Llaboral. Presentará’l so primer discu, Cicatrices, grabéu en Los Ánxeles y producíu polos prestixosos productores internacionales, Sebastian Krys y Sam Hansone. Cicatrices, Discu d’Oru n’España, convirtióse nel álbum más vendíu del país na semana del so llanzamientu ya inclúi canciones como’l duetu con Pablo López ‘No!’, ‘Hay algo en mí’ o’l so caberu single, ‘Mejor sin miedo’.

El sábadu 18 de mayu va ser la vez del humor con José Mota, Santiago Segura y Florentino Fernández. En ‘Dos tontos y yo’ salen xuntos al escenariu per primer vegada pa ufiertar reflexones, rises y disparates qu’ayuden a entender cuál ye anguaño el nuesu sentíu del humor. Escritu, dirixíu ya interpretáu polos trés humoristes, l’espectáculu va faer rir al públicu con doble función, a les 18:00 y 21:00 hores.

Les localidaes pal conciertu de Miriam Rodríguez tán disponibles a partir de 25 euros y pal show ‘Dos tontos y yo’, a partir de 24 euros. Les entraes pueden mercase na Recepción de la Llaboral, nel Centru Niemeyer n’Avilés, na Oficina d’Información Turística d’Asturies n’Uviéu, na web entraes.liberbank.es, nel teléfonu 902 106 601 y na rede de caxeros Liberbank.

Tags: