Tres l’ésitu de la iniciativa esti iviernu, la plataforma d’información sobre ociu y turismu ConocerAsturies.com y Cuatro Gotes Producciones retomen col bon tiempu XixónTours, un ciclu de visites guiaes temátiques n’asturianu que van ufrise al públicu a lo llargo de los meses del branu.

XixónTours ye una iniciativa pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu. 

Les rutes de XixónTours tán diseñaes pa buscar un averamientu orixinal a la hestoria de la ciudá, tratando de da-y un enfoque diferente que llame l’atención del públicu xeneral y n’especial de los y les xixoneses, que yá conociendo los llugares que van visitar, pa que puedan ver aspectos estremaos o desconocíos pa ellos.

Les visites d’esta segunda edición del ciclu XixónTours diseñáronles espertos nes cuestiones trataes en caúna de les temátiques de les mesmes, como Arantza Margolles, Daniel García de la Cuesta ya Inaciu Galán. Nesta ocasión van volver a facese trés rutes temátiques: 

Xixón mete mieu: Una ruta que va averar a los y les visitantes a los llugares hestóricos de la ciudá onde se produxeron asesinatos, matances, invasiones sangrines, apaiciones de pantasmes y lleendes que mos van llevar n’horariu nocherniegu a conocer los sitios más escuros, terroríficos y misteriosos de la hestoria de la ciudá de Xixón. 

Feches y horarios de les visites guiaes “Xixón mete mieu”

Xixón mete mieu

      • Vienres 14, a les 22 hores.
      • Vienres 21, a les 22 hores.
      • Vienres 28, a les 22 hores.

Escritores n’asturianu en Xixón: Munches cais y places de Xixón escuenden trozos de la hestoria de la lliteratura asturiana. El desapaecíu quioscu de Pachín de Melás na Plaza del 6 d’agostu, el Teatru Xovellanos, onde s’estrenaron munches obres d’Eladio Verde, el conventu de Cimavilla onde tuvo Xosefa Xovellanos, asina como espacios qu’apaecen na obra d’autores contemporáneos como María Teresa González, Pablo Antón Marín Estrada o Vicente García Oliva. Estos y otros llugares, coles sos hestories, formen parte d’una visita onde lliteratura y hestoria xúntase pa dar a conocer la ciudá.

Feches y horarios de les visites guiaes “Escritores n’asturianu en Xixón”

Escritores n’asturianu en Xixón

      • Sábadu 22, a les 12 la mañana.

Muyeres na hestoria de Xixón: La muyer, tapecida siempres na hestoria, apruz nesta visita guiada per Xixón. Una visita a la ciudá onde se falará de muyeres importantes na hestoria de la ciudá, como Xosefa Xovellanos, Aurora Sánchez, Corín Tellado, María González La Pondala, Concha Mori, Pepa Osorio, María Teresa González… ensin escaecer a los colectivos de muyeres anónimes que tanto marcaron el carácter d’esta villa, como les cigarreres, les pescaderes…y les tradiciones como la de les comadres, falando del papel de la muyer na sociedá, dende la falta de visibilidá hasta llegar a cuntar con alcaldeses. 

Feches y horarios de les visites guiaes “Muyeres na hestoria de Xixón”

Muyeres na hestoria de Xixón

      • Sábadu 8 a les 12 la mañana.
      • Sábadu 15 a les 12 la mañana.
      • Sábadu 29 a les 12 la mañana.

Les visites tienen un costu de 6 euros pal públicu xeneral y 3 euros pa menores de 18 años. Ye obligatorio inscribise na páxina web www.conocerasturies.com/xixontours a lo menos con un día d’antelación. El pagu faise al entamu de la visita n’efectivu. Pa más información o duldes pueden ponese en contacto nel corréu redaccion@conocerasturies.es

El proyectu xestiónalu Conocer Asturies, al traviés de Cuatro Gotes Producciones y cunta col sofitu de la Oficina de Normalización Llingüística de Xixón y la collaboración de Xixonaldia.com.