CONOCER ASTURIES CON… TOLI MORILLA

Toli Morilla (Uviéu, 1961) ye quiciabes el cantautor más importante de los que canten n’asturianu. La so música acústica muévese ente’l raigañu americanu, la canción d’autor, el folk y el llau intimista del rock. Tien dellos discos que marcaron la música asturiana de les últimes dos décades nel mercáu, ente los que ta «Nueche d’insomniu», «Entropía», que tien un tema que foi «Premiu al Meyor Cantar en llingua asturiana», asina como unu de versiones “Diez cantares de Bob Dylan n’asturianu”, del que s’editaron dos ediciones. Agora prepara discu nuevu y para un momentín con nós pa danos a conocer l’Asturies que más-y presta.

Un llugar pa perdese una fin de selmana… El Conceyu de Somiedu.

Un llugar pa vivir… Xixón.

Un platu… Verdines con mariscu.

Un postre… Peres al vinu.

Una sablera pa pasar el día… La Ñora, Quintes.

Un pueblín que nun podemos dexar de ver… Espinaréu.

Un chigre pa tomar unos culinos… Sidrería Dakar, en Xixón.

Un parque natural pa visitar… Muniel.los.

Una fiesta a la que nun faltar… Les fiestes na Carbayera de Granda, en
Xixón.

Un muséu pa recomendar… El Muséu de La Gaita del Pueblu d’Asturies en
Xixón.

Un momentu de la hestoria que te prestaría vivir… L’entamu d’un
Archivu Central de la Tradición, el Folklore y les Llingües Ibériques.

Un baille pa pasalo bien… Dos. El Swing, modernu, El Pericote,
tradicional.

Una pallabra n’asturianu que te preste… Filimicas, si ye asturiana,
faime gracia.

Una tradición que nun pue perdese… La Plantada de La H.oguera nel
Conceyu de Llanes.

Una espresión n’asturianu que te preste… Esi ¿Ayúdote yo,
ho?