in , ,

Tinéu, un destín d’oru

El MOA (Muséu del Oru d’Asturies) ta asitiáu nel pueblu de Navelgas (Tinéu), d’unos 300 habitantes, ricu en tradiciones, cultura y oru… El muséu ta allugáu en La Casona Capallexa, n’El Barriu San Nicolás, xunto a la ponte vieya y el ríu. Al traviés de les sos siete sales, el visitante afaya un muséu únicu, dedicáu al oru, al so valor y al de la hestoria de los homes que dende va sieglos llucharon contra la naturaleza pa llograr d’ella’l preciáu metal. Hestories antigües y relixoses, meyores médiques y tecnolóxiques, inxenieríes maxistrales axúntense en Navelgas pa que puedas conocelo too nun viaxe apasionante. Ástures, romanos, y lleendes del nuesu sieglu descúbenmos hestories de llucha, poder, ritos y símbolos.

El territoriu onde s’atopa allugáu’l pueblu de Navelgas ye conocíu como’l Valle del Oru, dada la bayura de xacimientos acuíferos. La zona yá foi trabayada polos sos primeros moradores, los Ástures, pero nun foi hasta la llegada del Imperiu Romanu (I D.C.), que la esplotación garra proporciones industriales, camudando por completu la orografía del valle. A empiezu del sieglu XX vuelven esplotase un par de les galeríes romanes, al traviés de la empresa “Aurífera Asturiana S.A.”. Tres el zarru de la mesma, delles persones empiecen a buscar l’oru directamente nel ríu, de forma totalmente artesanal, actividá que llega hasta la fecha.

 

Batéu d’oru

L’oru ufiértasenos na naturaleza de diverses formes pero, comúnmente lo que da llugar al elemental sistema del batéu ye l’aprovechamientu de los arrastres que faen les agües del ríu sobre les piedres de cuarzu que, metanes les nubes y bastiazos, ruémpen lliberando les pebides d’oru que lleven nel so interior. Estes pebides son llaminaes polos regodones quedando dixebraes en múltiples y pequeñes partícules que, pola mor del so altu pesu específicu (19,3) van depositándose nes veres. Pa recoyer estes pepites, precísase una batea, una especie de peñera que s’enllena de sable, y se somorguia nel agua. Al ximelgala, l’oru va depositándose no fondero dexando’l restu de material na parte superficial qu’al traviés de distintos movimientos, van flotando pasu ente pasu hasta que lo único que queda no fondero ye l’oru. 

Amás del muséu, la visita puede complementase cola realización del taller de batéu d’oru, onde los visitantes van poder deprender l’ancestral técnica del batéu. Amás, dende’l pueblu sal la ruta de la Buelga del Oru, un paséu de 1,5 quilómetros, onde pueden vese les señales entá visibiles de la gran esplotación romana llevada a cabu na zona.

Lleguen les ánimes pel occidente

WarCry apuerta a Avilés col meyor heavy en versión sinfónica