Talleres xurásicos pa esfrutar del branu nel MUJA

El muséu acaba amás d'acondicionar una nueva escena con dinosaurios carnívoros del Cretácicu, una pareya de Deynonychus y un Carnotaurus
Talleres xurásicos pa esfrutar del branu nel MUJA

El Muséu del Xurásicu d’Asturies (MUJA) ufierta esti branu una serie de talleres xurásicos para toles edaes. El públicu infantil de 4 a 11 años va poder conocer el trabayu d’un paleontólogu, dende la escavación y l’estracción de los fósiles hasta’l so analís nel llaboratoriu, en ‘Conviértite nun paleontólogu’. El públicu familiar con menores a partir de 4 años va poder xugar en familia pa conocer cómo son los rastros que nos dexaron los dinosaurios en ‘Ave paez, dinosauriu ye’. Tamién van poder aprender más nel Xardín del Muséu sobre los reptiles terrestres que poblaron la Tierra fai millones d’años en ‘Afayando la Mariña de los Dinosaurios’. Estos trés talleres van realizase en xunetu y agostu tolos díes, sacante los xueves.

El públicu familiar tamién va poder participar, xugando n’equipos, n’una yincana pol Xardín. Van tener que buscar les respuestes pa resolver l’enigma y afayar ‘El mensaxe de Richard Owen’ tolos xueves de xunetu y agostu.

Los horarios de los talleres y les entraes pa les actividaes o pa visitar el Muséu pueden mercase na web

Del 1 al 11 de setiembre, de miércoles a domingu, los visitantes van poder faer una espedición virtual abriendo ‘Una ventana al mundu de los dinosaurios’. Trátase d’un taller de realidá aumentada nel que van visitar otros museos xurásicos del mundu, van ponese frente por frente con un T-Rex y van viaxar hasta la estinción de los dinosaurios. El públicu infantil de 4 a 11 años va poder ser ‘Paleontólogu per un día’, buscando fósiles nun caxón de sable. Esta actividá inclúi un percorríu empuestu afechu a la so edá. Va realizase los díes 14, 15, 21, 28 y 29 de setiembre.

En casu d’agua, ‘Afayando la Mariña de los Dinosaurios’ va sustituyise por un taller familiar nel interior del Muséu y ‘El mensaxe de Richard Owen’, pol scape room ‘El misteriu de Owen’. Los horarios de los talleres y les entraes pa les actividaes o pa visitar el Muséu pueden mercase na web. Los miércoles, día d’accesu gratuitu, ye necesariu retirar primeramente la invitación online.

Un paséu pola Era de los Dinosaurios nel Xardín

El públicu que visite’l MUJA puede amás pasiar pola Era de los Dinosaurios afayando pieces orixinales del Xurásicu y reproducciones de dalgunos de los reptiles más representativos del Xurásicu y el Cretácicu. El MUJA acaba d’acondicionar una nueva escena con dinosaurios carnívoros del Cretácicu, una pareya de Deynonychus y un Carnotaurus, a lo que se suma que los dos Parasaurolophus y el Pachycephalosaurio del Xardín llucen nueva tonalidá. El Muséu tamién cunta dende’l pasáu mes de marzu con una nueva escena de Brachiosaurus nos esteriores, cola incorporación de dos reproducciones de críes d’esta especie de dinosauriu xurásicu.

A esto suma les retruques parciales de los yacimientos de icnitas de los cantiles de Tereñes, en Ribeseya, y de la sablera de La Griega, en Colunga y delles meses d’interpretación, en castellán y braille, que completen la información sobro estos yacimientos nel Xardín del Muséu. Amás, el MUJA cuenta nel esterior con un caxón d’escavación que contien distintos retruques de fósiles de dinosauriu (dientes, garres, güesos…) pa que los más pequenos puedan conocer parte del trabayu d’un paleontólogu.

Tags: