Selmana del Cachopu n’Ayer

Siete establecimientos hosteleros del conceyu participen nesti eventu gastronómicu
Ayer celebra la semana del cachopu

Ayer celebra la Selmana del Cachopu. Tres l’ésitu d’ediciones anteriores, los restoranes del conceyu decidieron dedicar toa una selmana a esti manxar. Asina, a partir del llunes podrán tastiase diez propuestes distintes en siete establecimientos de les localidaes de Morea, Nembra y Felechosa. Na Selmana del Cachopu d’Ayer van poder probase dende los tradicionales rellenos de xamón y quesu o de cecina y quesu de cabra, hasta los más innovadores rellenos de salteado de gambes, ajetes tienros, cogordes y crujiente de langostinos.

L’eventu gastronómicu entamáu pola asociación turística ‘Ayer Esperiencies’ y pol Conceyu d’Ayer va tener llugar del 10 al 16 de xunu. El preciu del cachopu ye de 12 euros. Los miembros del programa de fidelización turística ‘Ayer Adictu’ van poder beneficiase d’un 10 % de descuentu al presentar la so tarxeta nos restoranes Teyka, Sidrería Esperanza y La Casona.

L’orixe del cachopu ye inciertu. Lo que sí se sabe ye qu’anguaño constitúi una de les señes d’identidá de la cocina asturiana. Nos últimos años convirtióse n’unu de los platos más populares. A priori trátase d’un platu de cenciella ellaboración, pero lo cierto ye que la creatividá de los restauradores nun tien llendes y pueden atopase cachopos con rellenos de lo más variáu y sorprendente. Les propuestes van dende los más clásicos, hasta los más exóticos y vanguardistas. Too depende de la imaxinación de los nuesos restauradores, que nun se cansen d’anovar.

Tags: