Sara Baras torna al Niemeyer con un nuevu espectáculu: 'Sombras'
Sara Baras torna al Niemeyer con un nuevu espectáculu: 'Sombras'

Tres l’ésitu de l’actuación de Sara Baras en 2014 col so espectáculu ‘La Pepa’, l’artista vuelve visitar el Centru Niemeyer. Failo cola so última producción, titulada ‘Sombras‘, con dos funciones: el vienres 11 y sábadu 12 d’ochobre, dambes a les 20:30. Les entraes pueden adquirise dende güei mesmu. ‘Sombras’ ye un espectáculu creáu con motivu del ventiavu aniversariu del Ballet Flamencu Sara Baras. Dende’l so estrenu va dos años, la polifacética artista gaditana vien viaxando al traviés del so propiu tiempu, de la mano del silenciu, de la plasticidad y la elegancia nel escenariu, de la fuerza, de la lluz y sobremanera de les solombres.

L’espectáculu ye un vibrante percorríu pola evolución del so arte, con un protagonista inconmensurable: La Farruca, un palu que lu representa como nengún otru y que la identifica como lo que ye, una de les más sublimes esponentes del flamencu a nivel mundial. Nesta ocasión Baras coreografía y dirixe un espectáculu nel que se conxuga’l virtuosismu del so baille con atanantes coreografíes; lo tradicional y lo moderno con un xuegu de recursos técnicos de primer orde nos que la escenografía, roblada pol xenial pintor-Garabatista Andrés Mérida, xuega un papel perimportante, apurriendo color y testures.

Públicos de todas las nacionalidades se han rendido a los pies de Sara Baras

‘Sombras’ vien de percorrer el mundu enteru. Públicos de toles nacionalidaes rindiéronse a los pies de Sara Baras. Agora, ye la vez de qu’esa xuntura de sensaciones y arte llegue a Avilés. El Centru Niemeyer acueye a un espectáculu y a una artista que trió les tables d’escenarios tan míticos como’l City Center de Nueva York, el teatru Salder´s Wells de Londres, l’Opera House de Sydney, El Teatru Belles Artes de México, el Gran Teatru de Xinebra, el Teatru Splanade de Singapur, el Teatru Champs Elysees de París y el Teatru Orb de Tokio ente otros.

L’espectáculu cunta cola dirección y coreografía de Sara Baras, música de Keko Baldomero y testos de Santana de Yepes. ‘Sombras’ inclúi una collaboración especial con Ara Malikian. Con seis baillarinos y un programa compuestu por catorce temes el públicu va tener la oportunidá d’acompañar a Baras «na aventura del sentir».

Les entraes pa esti espectáculu tán a la vienta al preciu de 38 euros. Pueden adquirise nes recepciones del Centru Niemeyer, CITPA Uviéu y Llaboral Ciudá de la Cultura en Xixón, el teléfonu 902 106 601 y entraes.liberbank.es. Los socios del Club Cultura y los usuarios del Pasaporte Cultural pueden beneficiase d’un descuentu del 10% hasta’l 28 de setiembre y con un máximu de 75 localidá per función.