in

San Mateo abre una fin de selmana enllena de folixa

El Centro Niemeyer revive'l Fin d'Añu de 1979 con 'The Hole Zero'
El Centro Niemeyer revive'l Fin d'Añu de 1979 con 'The Hole Zero'

Asturies prepárase para una auténtica esplosión festiva en plenu setiembre. El pregón abre esti vienres les fiestes de San Mateo n’Uviéu, que van coincidir nel calendariu col Ecce-Homo en Noreña, el Santísimu Cristu de Candás y el Portal en Villaviciosa. Pero amás, el programa pa estos díes na comunidá inclúi conciertos, esposiciones y visites guiaes. Equí tienes delles idees para esfrutar del bon tiempu en familia o con amigos esta fin de selmana.

Espectáculos

‘The Hole Zero’ desembarca n’Avilés. Con un españíu d’allegría al berru de ‘¡Feliz 1980!’ l’Auditoriu del Centru Niemeyer va vivir seis celebraciones de Nuechevieya consecutives. Nesta ocasión el nuevu espectáculu entemez circu, cabaré, música y humor d’una forma distinta a los anteriores shows. ‘The Hole Zero’ dexa a un llau el cabaré européu y la revista española para inspirase nes fiestes discu de fínales de los años 70 y principios de los 80. Les cites queden afitaes nel calendariu pa los siguientes díes de setiembre: xueves 12 a les 20:30; vienres 13 a les 19:30 y 22:30; sábadu 14 a les 19:30 y 22:30 y domingu 15 a les 18:00.

Conciertos

Uviéu. Arrinquen les fiestes de San Mateo. Marta Sánchez va ser la encargada d’abrir el programa musical esti vienres a les 21 hores en La Llosa. Va garrar el relevu Carlos Baute a les 22:45 hores. El sábadu van actuar Willy Naves (20 hores), Los Enemigos (21:10 hores) ya Ilegales (22:40 hores). Van pesllar la selmana Cruz Cafuné y Dellafuente el domingu a les 21:45 y 23:45 hores respectivamente. Consulta’l programa completu de San Mateo.

Avilés. El parque de La Carriona, acueye una nueva edición del so Festival La Carriona Rock, esti vienres (19 hores). El Festival conmemora’l so décimu aniversariu con un cartelu compuestu na so totalidá por grupos asturianos, seis en total, y l’edición d’un CD.

Mieres. La Casa de Cultura Teodoro Cuesta acueye l’actuación de Guillermo López esti vienres 13 de setiembre a partir de les 20 hores. Músicu asturianu, guitarrista y compositor d’oficiu preséntanos el so primer trabayu en solitariu como cantautor. ‘Volver’ ye’l títulu del so proyectu y del so nuevu discu, nel qu’inclúi ocho cantares inéditos, embarcáu nun viaxe musical que lu lleva a salear pol pop rock de cantautor. La entrada ye gratuita.

Fiestes

Carreño. Candás acueye les sos esperaes Fiestes del Santísimu Cristu ente los díes 13 al 15 de setiembre. Mientres los díes festivos tán programaes actuaciones d’importantes orquestes del panorama nacional. Nun van faltar actividaes deportives, animación infantil, danza prima, pasacalles, desfile de charangues, conciertu coral, gastronomía y muncho más.

Noreña. La capital del conceyu acueye les sos Fiestes d’el Ecce-Homo, ente los díes 13 al 21 de setiembre. Fiesta relixosa na cual la imaxe sácase 9 díes antes de la so capiya y llegáu el día grande entámase una procesión dende la ilesia parroquial pa devolvela a la ermita. Dempués tien llugar una allegada romería y como broche de la fiesta’l baille del caldu. Estes fiestes amás cunten con ensame de festexos y actos pa tolos públicos, ente les que destaquen les verbenas. Consulta’l programa completu.

Villaviciosa. La localidá abre esti vienres les sos Fiestes de La nuesa Señora del Portal. Una amplia y variada programación va tener cabida hasta’l día 18, cuntando con actuaciones d’importantes orquestes del panorama nacional, actividaes deportives, animación infantil, procesión, gastronomía y muncho más. Equí tienes el programa completu d’actividaes pa estos díes.

Esposiciones

Teberga. El Parque de la Prehistoria acueye ‘10.000 a. L. (antes de Lego)‘, una amuesa que nos tresllada a la Prehistoria pa cuntar, al traviés de dellos diorames con miles de pieces de Lego, ónde vivíen los nuesos antepasaos, cómo yera la vida nun pobláu paleolíticu o cómo entraben a pintar nel interior de les cueves. Reproducciones de ferramientes y preseos, ídolos neolíticos, pintures y distintes construcciones que van sosprender a los más pequenos y van treslladar a la infancia a los adultos. Esposición temporal con entrada gratuita.

Xixón. Lego tamién ye protagonista nel Palaciu de Revillaxixéu, qu’acueye l’amuesa ‘I Love Lego‘. La esposición ta compuesta per seis mundos en miniatura creaos con más d’un millón de pieces de Lego.

Ribeseya. La sala d’esposiciones del Centru d’Arte Rupestre Tito Bustillo en Ribeseya acueye ‘Amanecer en lluces y solombres‘. Una amuesa de 45 cuadros sobro temes y ámbitos prehistóricos de Ludovico Rodríguez.

Villaviciosa. La Casa de los Hevia acueye l’amuesa fotográfica Carlos V, de Tazones a la Villa, hasta’l 18 de setiembre.

Llanes. La Casa de Cultura acueye hasta mayu l’amuesa La Xíriga y los Teyeros.E sposición de producción propia, comisariada por Higinio del Ríu Pérez. Puede visitase de llunes a vienres, de 17:30 a 21:00 hores; y los sábados de 11:00 a 13:00 y de 17:00 a 21:00 hores.

Teatru

Castrillón. El Centru Cultural Valey, en Piedrasblancas, acueye esti vienres 13 de setiembre a les 20 hores la representación de ‘Mucho ruido por unes nueces‘, al cargu de Teatru El Hórreo. Un nuevu cura, D. Sindulfo, d’idees izquierdistes, llega a un pueblu onde lleva unos años de alcalde Juan. Dende’l primer alcuentru de los dos salten chispes, y un periodista nun va faer más qu’echar lleña al fueu. El preciu de la entrada ye de 4 euros.

El Franco. L’Auditoriu As Quintas acueye la representación de ‘Papá y mamá se enamoran‘, actividá enmarcada nes Nueches de Teatru de la XXXVI Quincena Cultural San Miguel. El Grupu de Teatru Casadoiro representa esta comedia d’enriedos ente families. Esti vienres a les 21:30 hores. Preciu: 2 euros.

Llangréu. El Nuevu Teatru de La Felguera acueye la representación de ‘El armario empotrado’, una comedia costumbrista ambientada nel conceyu d’Ayer. La trama trescurre nuna colomina de Oyanco, cuando la protagonista recibe una heriedu sorprendente que, al pie de la so vecina de paré, lleváralu a vivir situaciones inesperaes y realizar un viaxe pola hestoria del conceyu. A les 20:15 hores.

Rutes guiaes

Uviéu. En realizando una visita panorámica pela ciudá, esti itinerariu empieza nel Centru d’Interpretación del Prerrománicu Asturianu, na falda del monte Naranco; pa treslladase dempués a la ilesia de Santuyano, el mayor de los edificios prerrománicos que se caltienen, nel que destaquen les pintures del interior. Yá nel centru d’Uviéu, va visitase la Fonte de Foncalada, únicu exemplu d’arquitectura civil del prerrománicu asturianu que se caltien. En Villaviciosa, va visitase l’espectacular conxuntu del Monesteriu de Santa María de Valdediós, nel que s’atopa la ilesia prerrománica de Salvador de Valdediós, construyida mientres el mandatu d’Alfonso III. El preciu de la entrada ye de 15 euros. Más información: Turismo Asturies.

Xixón. Entá tas a tiempu d’inscribite na última ruta de Xixón mete mieu d’esti branu. La ruta, que parte de la plaza del Marqués a les 21 hores, fai un percorríu polos crímenes, lleendes y edificios que fueron escenarios de los mayores misterios de la ciudá. La historiadora, arqueóloga y presentadora Arantza Margolles guia esti viaxe poles cais de Cimavilla. La ruta tien un preciu de 6 euros, 3 pa menores de 13 a 18 años. Más información ya inscripciones en Xixón Tours.

Cuideiru. Hasta’l 29 de setiembre puede visitase’l Conxuntu Palaciegu Selgas. La Fundación Selgas-Fagalde va permanecer abierta al públicu de martes a domingu n’horariu de 11 a 20 hores.

Castrillón, la mar que ver

El camín medieval a Banduxu

El camín medieval a Banduxu