‘Sabores de plaza en plaza’ algama la so cuarta edición

Del 31 de xunetu al 4 d'agostu, en casetes repartíes ente les places d'El Carbayedo, Álvarez Acebal y Carlos Lobo
'Sabores de plaza en plaza' algama la so cuarta edición

Vuelve ‘Sabores de plaza en plaza‘, que se va desenvolver ente’l miércoles 31 de xunetu y el 4 d’agostu. Una propuesta que se convirtió nel empiezu oficiosu de les festividaes del mes d’agostu, y na que participen establecimientos hosteleros de la ciudá. ‘Sabores de plaza en plaza’ convida a pasiar pol cascu históricu, mientres s’ufierta la posibilidá de tastiar propuestes gastronómiques, tapes orixinales ya innovadores, acompañaes de bébora. Les casetes preparaes a tal fin que se van distribuyir en trés espacios singulares d’Avilés, como son les places de Carlos Lobo, Domingo Álvarez Acebal y El Carbayedo.

Nun va faltar l’ambientación musical, al cargu de distintes bandes locales que, como novedá, van ufiertar los sos conciertos dende la Campanera Furgo Party’, de Fred Events, una furgoneta clásica restaurada con ciñu y preparada pa ufiertar música y ambientación. En sí mesma constitúi un atractivu turísticu qu’añade valor a les degustaciones gastronómiques.

L’oxetivu d’esta iniciativa ye convertir el paséu y la visita pel centru de la ciudá nuna esperiencia distinta, conxugando la faceta gourmet, el saber faer de los establecimientos hosteleros d’Avilés al traviés de la orixinalidá de los taragaños que preparen, siempres enfocaos a la calidá del productu y a l’atención al públicu, con ambientación d’orixinal música indie poles trés places. Una cita capaz d’atraer visitantes, mientres refuerza y proxecta la imaxe turística de la ciudá como enclave ricu en propuestes culturales, gastronómiques y d’ociu.

Les casetes van permanecer abiertes del 31 de xunetu al 4 d’agostu n’horarios de 13 a 16 hores y de 20 a 23 hores.

Establecimientos participantes

Plaza del Carbayedo
MoMA
Galiana 54
La Muralla
Filan
La Casina de Luisin

Plaza de Carlos Lobo
La Llosa
theolaferrería
La Dársena
El Portón

Plaza d’Álvarez Acebal
Merlot Vinos y Tapes
El Café de Pandora
Puntu d’Alcuentru La Madreña

Sortéu d’un viaxe pa dos

Per tercer añu consecutivu, ‘Sabores de plaza en plaza’ va ufiertar a los veceros que consuman tapes o taragaños en trés establecimientos distintos, siquier ún per cada plaza, la posibilidá d’optar al sortéu d’un viaxe pa dos persones. Pa ello van haber de solicitar el selláu de los trés caxellos que, con esi oxetivu, apaecen nel folletu guía de ‘Sabores de plaza en plaza’.

Tags: