El camín medieval a Banduxu

Nos Valles del Osu, nel conceyu Proaza, atopamos l’aldea de Banduxu, considerada como’l pueblu medieval meyor conserváu n’Asturies. Ta claro qu’en parte pola mor de la so inaccesibilidá, yá qu’hasta los años 80 del sieglu XX nun esistía carretera, polo que la única vía de comunicación yera esta calzada medieval que güei vamos percorrer.

Pa entamar la ruta tenemos que dirixinos en dirección Trubia, pela AS-228 travesamos Proaza y al llegar al cruce de Caranga Baxu xiramos a la drecha siguiendo pela AS-228 alredor de 1,5 quilómetros. Un pocoñín más alantre y xunto a una señal indicadora del Puertu Ventana y Samartín de Teberga, al rodiu del quilómetru 21, podemos dexar el coche.

A pocos metros, frente a la marquesina de la parada del autobús, travesamos el ríu Teberga per una ponte de formigón, accediendo a la sienda l’Osu. Xiramos a la drecha como si volviéremos pa Caranga y en malpenes 40 metros atopamos un cartelu que pon ‘Banduxu, camín medieval’, esti ye’l puntu d’iniciu de la nuesa ruta. El regatu Valmauru va acompañanos bona parte del camín, y mui pronto vamos llegar a La Foz, que comparte nome col regatu, y ehí ye onde vamos entamar a esfrutar de la caprichosa orografía que talló’l ríu.

A lo llargo del senderu vamos atopar hasta seis pontes, tres la segunda podemos ver como’l camín se fai cada vegada más pindiu y empezaremos a dexar atrás los perguapos tabayones que chisquen La Foz mientres vemos como’l valle entama a abrise, esti ye’l puntu perfectu pa fixanos na cantidá d’especies que tenemos presentes nesta zona con guapos exemplos de carbayos y castañales arrodiando los caminos y siendes, pero tamién otros como l’ablanal, l’umeru o la borrachinal, qu’anque ye planta típica mediterránea, nestos valles del Osu de naturaleza silicéa atopa un microclima mui favoratible pal so desarrollu.

Esisten munches semeyes d’esta aldea, pero nenguna comparable a la imaxe qu’unu tien cuando xube pel camín medieval

Mientres xubimos pel camín empedráu resulta increyible pensar que, hasta fai poco más de venti años, esti senderu tovía s’utilizaba pa llevar al ganáu a les feries cercanes de Proaza o Teberga. Yá na parte más abierta del valle, onde la sienda se retuerce una y otra vegada en forma de zigzag, podemos ver Banduxu a lo lloñe. Esisten munchos retratos y semeyes d’esta aldea, sobre manera a consecuencia de la promoción turística, pero nenguna d’elles ye comparable a la imaxe qu’unu tien cuando xube pel camín medieval.

Un poco más alantre recíbenos el primer barriu del pueblu, La Molina, con unes guapes vistes de la Sierra Marabiu al fondu. El premiu al nuesu esfuerzu ye poder caleyar pelos cinco barrios que formen esta aldea: La Molina, El Palaciu, Entelailesia, La Reguera, El Campal y El Toral.

Entamanos el camín de vuelta, agora cola imaxe frente a los nuesos güeyos de la Sierra l’Aramu, onde podemos ver al fondu l’antena del Picu Gamoniteiru. Nun hai qu’escaecer qu’esti pueblu foi la primer capital del conceyu Proaza. Amás, esisten documentos de los sieglos VIII y IX que conseñen la so importancia reconociéndola como villa o llugar venceyáu a la sociedá feudal. Del so valor y señoríu ñaz el famosu refrán: “En Banduxu canta l’uxu, en Traspieña la rapiega, y baxando pa Caranga la miseria».

La ruta

Distancia: 10 km aprosimao dir y tornar
Desnivel: 300 metros
Duración: 4 hores
Llugar: Proaza
Dificultá: fácil (nun ye senderu homologáu)
Recomendaciones: evitar époques de lluvies, ya que le piedra del camín ye esbariadizo