in

Que Nun Apare! enllena Samartín de cultura

Que Nun Apare! enllena Samartín de cultura
Que Nun Apare! enllena Samartín de cultura

L’asociación cultural Que Nun Apare! vuelve con más puxu que nunca y esti añu amplía’l so festival a dos díes de duración. El 14 y 15 de xunu, Samartín va acoyer la tercer edición d’esti eventu qu’axunta un total de dieciocho actividaes bien variaes rellacionaes col deporte, la cultura hip hop y reggae, les tradiciones asturianes, la música, los xuegos, y la educación. Too ello de baldre y pa tolos públicos.

El vienres 14 la Plazoleta La Ilesia de L’Entregu centra toles actividaes pa esi día. A les 18.30 arranca’l taller ‘Bombes de Semientes’ con Güerta Escuela La Llera pa llueu dar protagonismu a la música con un pasucais d’Élite Charanga (19h), un conciertu del grupu folk Fontoria (21.30h) y la sesión de DJ ‘Dani Antistailo meets 33900 Vinyl Club’ (23h).

Al día siguiente la diversión y la cultura nun va a parar nel Parque d’El Florán. De 12 a 20h hai xuegos hinchables pa neños y neñes, amás d’un mercáu d’asociaciones y artesanía, l’amuesa de graffiti y los xuegos y deportes tradicionales con 6 conceyos. La bandina folk Cuatrolán va percorrer a la una’l mediudía les cais de Sotrondio y Blimea enantes de dar pasu a la sesión vermú-culete cola actuación de les pandereteres feministes Nun Tamos Toes.

Esti festival nació en 2017 col oxetivu d’enllenar el vacíu que dexó la non celebración de les tradicionales fiestes de La Llaguna

Pela tarde arranquen les actividaes más rellacionaes cola cultura urbano. La sound system del colectivu asturianu Allanái va facer qu’El Florán baille a ritmu de la música xamaicana. Amás, va haber talleres d’ellaboración de xabones de llana con Trebeyos (17h) y ‘¿Qué ye’l Live dub mix?’ con Riantz & Ovella Negra (18h). Amás, el programa radiofónicu Fat Sounds va emitir en directo dende les 17h. A les 17.30h el club La Güestia Roller Derby va facer una amuesa de Roller Derby, un deporte de contactu sobre patines orixinariu d’Estaos Xuníos.

Los conciertos van ser de 20h a 00.30h. Van actuar el dúu de versiones Los Juanillous, los raperos La Ziega y Doris Escarlata y el Dj de música folk-electrónica Fruela 757. El ramu va ponelo la sound system, qu’hasta bien entrada la nueche va sonar cuntando cola participación nos micrófonos de los asturianos Allanái Crew, los vascos Airaldeko Sound System Dj Set + Ziztada Mc, los gallegos Ovella Negra y a la cantante de Pamplona Sistah Kata.

Mocedá, autoxestionada y con valores

Con esta nueva edición, Que Nun Apare! vien a enllenar el vacíu que dexó la non celebración de les fiestes de La Llaguna. Una programación cultural y d’ociu diversa que pon en valor la interculturalidá, el papel de la muyer y la llingua asturiana. La mocedá ye la protagonista d’esti eventu autoxestionáu y ensin ánimu d’arriquecimientu que se celebra per tercer añu gracies al sofitu popular, al comerciu y la hostelería de Samartín.

Fiestes de San Antoniu en Muros

Fiestes de San Antoniu en Muros

Horariu de los autobuses 'curuxa' de Mieres por San Xuan

Horariu de los autobuses ‘curuxa’ de Mieres por San Xuan