in , ,

PlayPresta presenta en Villaviciosa ‘Proyectu webserie’, la primer serie de ficción 100% n’asturianu.

El salón d’actos del centro cultural San Juan de Capistrano afaya güei 15 de marzu, a les 19:00, el preestrenu de Proyectu Webserie, amosando los trés primeros capítulos d’esti llamativu trabayu, fechu 100% n’asturianu. PlayPresta presenta esti proyectu tres dellos averamientos al xéneru de la webserie de namás un personaxe, con exemplos como “Bertucu” y dellos de los capítulos de “Hortensia”. Los responsables de la canal dan agora  un nuevu pasu cola creación d’esta webserie de ficción y baxu costu, creada pol maliayés Marcos S. L. (tamién creador de Bertucu Show, Les coses series en Playpresta), con una primer temporada d’ocho capítulos. La capital maliaya ufiertara amás la oportunidá de conocer al equipu detrás d’esti proyectu ensin precedentes n’Asturies.

 

Proyectu Webserie cuenta la hestoria de Xurde (Pablo Mare), Adriana (Olaya Pena) y Oliver (Sergio Ordóñez), unos mozos que tienen una canal d’entretenimientu online que diciden realizar una webserie cuando, de casualidá, Xurde reencuentrase con una actriz y antigua compañera d’institutu: Ayalga (Bea Canteli), de la que lleva namoráu va cuantayá. A partir d’equí, vamos ver les dificultaes poles que van pasar estos rapazos pa ser a completar esta webserie: falta d’actores,  d’idees, de localizaciones, de perres…  Too esto demientres Adriana trata de solucionar estos problemes pa sacar la serie p’alantre, cola ayuda d’una Ayalga bien ilusionada col proyectu, pero con un Xurde más pendiente de quedar bien col amor de la so vida que de facer la serie. En medio d’esto, Oliver, un youtuber un pocu curtiu d’entendederes, asegurará pingarates d’humor absurdu coles sos ocurrencies estravagantes.

 

La canal PlayPresta sigue cola so llinía clara de trabayu, con un predominiu del sentíu del humor, y poniendo’l güeyu sobre les modes d’Internet (sobremanera con referencies a otres webseries como Malviviendo) y los vídeos virales tan característicos de YouTube (gameplays, challenges…). A les referencies a memes y tutoriales populares na rede, xúnense tamién les autoreferencies a la canal asturiana, amosando l’habilidá de rise d’ellos mesmos. Proyectu Webserie cuenta igualmente con guiños y un par de sorpresines dedicaos a los habituales de PlayPresta, que van a atopar  bien divertíos.

Planes d’ociu pal mes de marzu n’Avilés y Xixón

Colunga celebra esta selmana’l XII Salón del Títere «Saltitiricol»