Planes pa esfrutar en familia del postreru finde del añu

La última fin de selmana llega cargada de planes en familia pa esfrutar d'un descansu al pie de los más pequenos de la casa

0
20
Na semeya, la pista de xelu de Xixón.

L’añu nuevu ta cada vez más cerca. Avientu forfuga los últimos díes del añu antes de la llegada de 2020. La última fin de selmana llega cargada de planes en familia pa esfrutar d’un descansu al pie de los más pequenos de la casa. Uviéu vive estos díes somorguiáu nel espíritu navidiegu. El llume navidiego convirtióse nunu de los principales atractivos de la capital asturiana estos díes, amás del mercáu navidiegu de la plaza Porlier, una de les grandes novedaes d’esti añu.

Tamién hai mercáu nel paséu de Begoña de Xixón. Los más pequenos son los protagonistes en Mercaplana. El salón pa la infancia y la mocedá va abrir les sos puertes hasta’l próximu 4 de xineru de 16 a 20:30 hores. El preciu de la entrada ye de 4 euros, anque esiste la opción de mercar bonos y talonarios d’entraes. La pista de xelu y el monte de la nieve del ‘solarón’, una de les mayores instalaes n’España, con más de 630 metros cuadraos, va tar abierta tou la fin de selmana.

Avilés anueva un añu más la tradición de los belenes navidiegos. La XI Esposición Colectiva de Belenes (C/ de La Fruta, 11) acueye 9 escenes de nacencies tradicionales y populares y 11 belenes de cumes. La carpa d’actividaes de La Esposición va ser escenariu amás de distintes actividaes pa tolos públicos, dende cuentacuentos a verbenes.

Esta fin de selmana (13 hores) el Parque de la Prehistoria en Teberga acueye Lluces pal artista. Visita taller y guiáu a la cueva de cueves con llámpara de cañamina. Una esperiencia pa familiarizase coles técniques de llume qu’utilizaben los nuesos antepasaos. Primero va conocese’l procesu d’ellaboración d’una llámpara prehistórica, que darréu utilizaráse na visita p’allumar los paneles de la Cueva de Cueves. El llume de les llámpares de cañamina espierta los sentíos. Les lluces y solombres xeneren sensación de movimientu, creando un espaciu templao y envolvente que nos tresllada a un mundu máxicu. Preciu: 8,08 euros.

El Centru d’Arte Tito Bustillo en Ribeseya acueye Pequeños artistes de la Prehistoria. El taller ta empobináu a publico infantil ente 4 a 11 años. Van esperimentar con aerógrafos, pigmentos y piedres de colores pa convertise n’artistes de la Prehistoria y afayar cómo los nuesos antepasaos pintaron cueves como la de Tito Bustillo. Preciu: 2,50 euros.

El Muséu del Xurásicu d’Asturies en Colunga acueye Dinocookies (11:30 y 17:30 hores), un taller pa neños ente 4 y 11 años. En Navidá nun pueden faltar los dulces. Nesti taller los más pequenos van aprender con Cantarero chocolates que’l secretu sí ta na masa. Preciu: 3 euros.