El mes de marzu marca l’entamu de la primavera y entren ganes de facer planes d’ociu. Ufrímoste dellos previstos pa esti mes nel Centru Niemeyer d’Avilés, na Llaboral de Xixón y nel espaciu escénicu El Huerto.

Entamamos nel paraninfu de la Llaboral, onde’l sábadu 23 de marzu a les 11 hores va celebrase una masterclass impartida pol realizador Elías León Siminiani. Una actividá gratuita previa retirada de convidada.

Nos postreros cinco años Elías León Siminiani compaxinó «Apuntes para una película de atracos», un proyectu personal que sigue la llinia d’ensayu y diariu fílmicu desenvuelta va años, con «El caso Asunta» (Antena 3) y «El caso Alcásser» (en procesu de rodaxe pa Netflix), dos series documentales d’investigación periodística popularmente conocíes como true crime.

Nesta clas, el realizador va tratar de facer una crónica de la negociación que s’establez ente’l trabayu, nuna producción ultra pequena de cine y el trabayu con vocación más global y de plataforma. Y de cómo, ellí onde trabaye, l’oxetivu a la fin siempres ye la consecución d’un rellatu que, primero de too, seya cinematográficu.

    • Fecha y hora: sábadu 23 de marzu a les 11.00 h.
    • Duración: 3 hores.
    • Empobináu a: realizadores, guionistes y públicu xeneral.
    • Places: 150.
    • Preciu: gratuitu previa retirada d’invitación.

El director va participar, amás, na proyección del so últimu llargumetraxe «Apuntes para una pelíocula de atracos», que se va realizar el mesmu sábadu 23 nel Paraninfu de la Llaboral y va caltener un alcuentru posterior col públicu asistente.

Esi mesmu sábadu tienes otra alternativa tamién na Llaboral ye La to güerta en casa, nel espaciu Permacultural de la Llaboral y de magar les 10:30 hores.

Si lo que quies ye tener una güertina en casa, na to terraza, balcón o xardín… esti taller ye pa ti. Vas deprender los principios básicos de cultivu eco pa entamar a crear el to güertu urbanu en pequeños espacios, vas conocer qué sustratos tienes d’utilizar, cuálos son los meyores contenedores de llantadera y les necesidaes mínimes de les tos verdures, hortolices y plantes arumoses favorites. Tres paticipar nesta actividá vas poder tresformar l’espaciu del que dispones nun güertín onde cultivar los alimentos que vas llevar a la mesa utilizando sistemes cenciellos y granibles a pequeña escala.

    • Impartíu por: Lucía Ríos Piñeiro.
    • Empobináu a: adultos.
    • Fecha y hora: sábadu 23 de marzu de 10.30 a 13.30 hores.
    • Puntu d’alcuentru: nel Espaciu Permacultural 15 min. enantes del entamu del taller.
    • Places: 20.
    • Preciu Club: 13€ (preciu xeneral: 15€).
    • Observaciones: actividá realizada nel esterior; podría sufrir dalgún cambéu d’allugamientu y temática dependiendo de la meteoroloxía.

Yá pal domingu 24 de marzu a les 17.30 hores, nel Paraninfu de la Llaboral, y a un preciu de 4€ (3€ pa socios/es) va celebrase una proyección de cine dalgo distinta titulada Pequeños de cine.

Esiste un cine destináu a les audiencies más moces y al públicu familiar que tien como oxetivu, amás d’apurrir entretenimientu y arimar fascinación, ufiertar a esti públicu conteníos diversos, alternativos ya innovadores que-yos dexen crecer como espectadores críticos. Un tipu de cine que desgraciadamente atopa pocu acomodu nos ámbitos comerciales del audiovisual y que comparte cola Llaboral Cinemateca una vocación pola formación de nuevos espectadores con una mirada más abierta y plural.

Nesta sesión especialmente escurrida pal públicu infantil y xuvenil, la entidá axunta obres orixinales y estimulantes rebosantes d’idees y encantu, munches d’elles con una esitosa trayectoria en festivales nacionales ya internacionales, como Ryoko Emilio Gallego, Jesus Gallego. España, 2018 (4 min), Færing Camille Alméras. Francia, 2017 (10 min), Una idea Juan Paulín. Méxicu, 2018 (7 min), Mogu and Perol Tsuneo Goda. Xapón, 2018 (9 min), The Incredible Wardrobegadget of Dr. Stein. Gabriela Plackova. Rep. Checa, 2018 (13 min.), Wanda runs. Denise Hauser. Noruega, 2018 (13 min) y Hors Piste Léo Brunel, Loris Cavalier, Camille Jalabert, Oscar Mallet. Francia, 2018 (6 min)

El huerto en familia, ciclu de teatru pa la reciella, llega al Espacio El Huerto, asitiáu na cai Severo Ochoa, 91, en Xixón. Teatru, maxa, danza, títeres… Diversión pa tola familia na nueva programación que preparó l’Espaciu Escénicu El Huerto pa los próximos meses y que los menores de 16 años van poder esfrutar con un 20% de descuentu.

El domingu 24 a les 12.30 y 18.00h: Los pintores del Grupo Los Pintores: Ente música y baille dos Pintores colos sos preseos de trabayu, narren la hestoria de trés pichones que, magar nun emplumaron como adultos, deseyen correr mundu y viaxar, motivaos poles andances d’un pelícanu artista. Edá encamentada: a partir de 4 años.

Si lo que quies ye un plan tranquilu y musical, la cúpula del Centru Niemeyer va acoyer el domingu 31 de marzu a les 13 hores una actuación de La Orques de Cámara Galega, con un preciu de 6€ pal públicu xeneral.

La Orquesta de Cámara Galega arranca’l so camín en 1995 por iniciativa de Rogelio Groba Otero. La formación ta integrada por músicos formaos en diversos conservatorios europeos y desenvolvió una intensa actividá que lu llevó a interpretar un ampliu repertoriu dende’l barrocu tempranu hasta güei. La formación tamién s’esmoleció del espardimientu de compositores gallegos, incluyendo la estensa obra del compositor Rogelio Groba.

El conxuntu musical va ufiertar nel so conciertu Sonidos del Atlántico, música de cámara y contemporanea creada por compositores de distintos países que tuvieron influencia del nuesu océanu a lo llargo de la hestoria, faciendo un especial fincapié n’autores españoles ya iberoamericanos. Esto da como resultáu un abanicu musical bien abiertu y variable.

Tags: