El Niemeyer revive’l Fin d’Añu de 1979 con ‘The Hole Zero’

L’Auditoriu del Centru Niemeyer volverá entrar nel furacu col nuevu espectáculu de la compañía Let’s Go, tituláu nesta ocasión ‘The Hole Zero‘. Les entraes pa esta nueva ocasión d’esfrutar del espectáculu más canalla de la cartelera yá tán a la vienta. Con un españíu d’allegría al berru de ‘¡Feliz 1980!’ l’Auditoriu del Centru Niemeyer va vivir seis celebraciones de Nuechevieya consecutives mientres el mes de setiembre. Les cites queden afitaes nel calendariu para los díes: 6 a les 20:30; 7 a les 19:00 y 22:00; sábadu a les 17:00 y 22:00 y domingu a les 17:00.

Nesta ocasión el nuevu espectáculu entemez circu, cabaré, música y humor d’una forma distinta a los anteriores shows. ‘The Hole Zero’ dexa a un llau’l cabaré européu y la revista española pa inspirase nes fiestes discu de finales de los años 70 y principios de los 80. Una fiesta al más puru estilu ‘The Hole’, con un nivel insuperable nos sos númberos y na calidá de los artistes, cola música como un elementu indispensable, con canalléu, un puntu sexy, un importante factor sorpresa y diversión asegurada. Y cómo non, con una hestoria de fondu qu’actúa como filu conductor de tol espectáculu y qu’esplica l’orixe de ‘The Hole’.

El nuevu espectáculu entemez circu, cabaré, música y humor d’una forma distinta, dexando a un llau el cabaré européu y la revista

La hestoria d’esta nueva entrega empieza cuando’l maestru de ceremonies viaxa, a finales de la década de los 70, d’España a Nueva York. Séra l’anfitrión de Studio 54, la see mundial de la modernidá, la llibertá y la diversión, el puntu d’alcuentru pa tolos que, n’aquel momentu, queríen contribuyir al arte y la creatividá. Y equí ye onde nació’l furacu. Yá en Nueva York, en plena esquiciadura de la Nuechevieya de 1979, el maestru de ceremonies va enfrentase a la so mayor torga. Los espectadores qu’entren nesti nuevu furacu van poder afayalu en setiembre nel Auditoriu del Centru Niemeyer.

‘The Hole’ y ‘The Hole 2’ consiguieron que, solo n’España, más d’un millón y mediu d’espectadores entraren nel furacu. Dambos shows siguen la so frenética trayectoria. ‘The Hole’ visitó yá más de 40 ciudaes españoles. L’espectáculu saltó les nueses fronteres p’abrir nuevos furacos en México D.F., cerró l’añu en Milán, recibió a los Reis Magos en París, aterrizó en plena cai Corrientes de Buenos Aires, tomó unes cerveces en Colonia (Alemaña)…, y sigue la so xira nacional.

‘The Hole’ visitó yá más de 40 ciudaes españoles y saltó les nueses fronteres

‘The Hole Zero’ cunta con testos y dramaturxa de Félix Sabrosu, la dirección artística de Esteve Ferrer y con Iñaki Fernández como productor artísticu. Na parte interpretativa El terremotu de Alcorcón y Cristina Medina van alternar nel papel de maestros de ceremonies. Ente los principales papeles atópense Lorena Calero como La Diva, Cristóbal Garrido como Lucy, Julio César Joseph Castillo como Salomón, Eva Diago como DJ Frera y Julio Bellido como Bola Disco. Los espectadores que nun pudieren ver les hestories de ‘The Hole’ o ‘The Hole 2’ van poder asistir a ‘The Hole Zero’ y entender y esfrutar perfectamente l’espectáculu.

‘The Hole Zero’ va tener llugar nel Auditoriu del Centru Niemeyer los díes 12, 13, 14 y 15 de setiembre. Les entraes yá tán a la vienta a un preciu xeneral de 36 euros. Pueden adquirise nes taquilles del Centru Niemeyer (Avilés), Llaboral Ciudá de la Cultura (Xixón) y CITPA (Uviéu), nel teléfonu 902 106 601 y en Liberbank – entraes (www.liberbank.es).