Ñaz un ciclu pa presentar novedaes discográfiques asturianes con conciertos emitíos per internet

L-R y Xaime Martínez abren el 16 de marzu esti ciclu de conciertos en formatu íntimu, grabaos y emitíos al traviés d’Internet

Una mezcla ente un conciertu acústicu con aforu reducíu, un programa de televisión y un alderique; too ello retresmitío per Internet pa que llegue a más persones de tol mundu. Asina ye Amosando, el ciclu de presentaciones de discos entamáu por Musicasturiana.com que va escomenzar el 16 de marzu en Xixón col conciertu/grabación de L-R y Xaime Martínez y al que van siguir en 2019 otres cuatro actuaciones/emisiones.

Un proyectu que lo sos responsables espliquen «ñaz pa visibilizar a la música asturiana dientro y fuera de les nuestres fronteres como una ferramienta promocional adaptada a los vezos actuales de consumir música». Esta iniciativa pionera n’Asturies influyida por otres esperiencies asemeyaes esitoses n’otres partes del planeta. Éstes son les característiques coles que ñaz Amosando «pa intentar valtar ún de los más grandes problemes que tien la música asturiana: la poca promoción», esplica Xicu Ariza, responsable de la iniciativa.

«Amosando nagua por ufrir daqué orixinal y atractivu, con un formatu nel que los artistes van tocar los cantares del so discu más nuevu énte un públicu reducío que va poder preguntar y aldericar col artista en vivo, p’asina fomentar la cercanía y interrellación ente los músicos y los sos siguidores», asegura Ariza. Los conciertos van grabase, van emitise en formatu audiovisual per Internet y van promocionase activamente al traviés de les redes sociales pa que se puedan ver dende cualesquier llugar del mundu.

Artistes y organizadores

El 16 de marzu entama esti ciclu cola participación de L-R, dúu post-folk formáu por los reputaos músicos Rubén Bada y Leticia Baselgas, y de Xaime Martínez, proyectu en solitariu del cabezaleru de La Bande qu’axunta música indie, folk, canción d’autor y poesía. Van presentar los sos discos publicaos el pasáu avientu: ‘Post-Folk-Asturianu’ y ‘Ósculos d’Agua nel Imperiu Asturianu’, los dos nominaos apocayá a los Premios AMAS nes categoríes de Meyor Discu Folk y Meyor Canción Folk. Les entraes son de baldre y van sortease ente quien participen nun concursu llanzáu por Musicasturiana.com.

Otres cuatro actuaciones/emisiones por anunciar van ser la continuación nel 2019 d’esti ciclu entamáu pola tienda en llinia y distribuidora dixital Musicasturiana.com, grabáu pol realizador Javier Lueje nos sos estudios de Xixón y producíu por Goxe Producciones. La primera d’estes emisiones ta patrocinada pola estaya de Turismu del Ayuntamientu de Xixón, por Caxa Rural d’Asturies y por Borines Selección d’Agua de Borines.

Tags: