Maxi Areñes: “Paezme una vergoña qu’en FITUR repartieren la sidra en copes y ensin escanciar”

Maxi Areñes ye un músicu y escritor que dende Areñes, en Piloña, vien entamando una bayurosa propuesta cultural dende distintos ámbitos. Ta acabante sacar llibru y col so grupu Fontoria, un discu tituláu Nordés. Con esta escusa falamos con él de los sos proyectos y de la so visión de la cultura n’Asturies.

¿Cómo ñaz Fontoria?
Fontoria ñaz na primavera de 2017. Cúmplense agora dos años, como una banda p’acompañame nos mios conciertos. Dempués decidimos que podía tar bien formar un grupu al usu, yá qu’en Piloña nun salía nenguna formación dende la desaparición del grupu Cuerria. Basicamente asina entamó. Pasaron per equí muncha xente, hebo los sos más y los sos menos, y al final tamos los que tenemos que tar.

Ye prestoso saber que Fontoria sirvió tamien de cantera musical. Agora na formación tamos Rita María Álvarez col vigulín, Xosé Ánxel “Allende” coles gaites, Pablo Pumarada cola percusión y un servidor lladrando y tocando un pocu de tou. Amás agora, de cara a los directos, llevamos dellos músicos d’apoyu. Préstame muncho, porque pues llevar a quien t’apeteza pa esi conciertu determináu. Los ensayos son tan cansaos como divertíos, interactues con musicazos de los que pues deprender abondo. El públicu va sorprendese na xira que vamos entamar.

¿Cómo encaxa la música asturiana cola de Breizh?
La Breizh Musik y los sones asturianos encaxen a la perfección, ye más, la estructura de los cantares, de les dances, son mui asemeyaes, más de lo que podría imaxinar el públicu. Soi un namoráu de la música bretona, por suerte o por desgracia pertenezo a esa escuela, a Allende pása-y lo mesmo y quieras que non esta almiración por esos sones acaben por contaxar al restu de los músicos. Yo pudi conocer dellos festivales, el de L’Orient y de Niort de los 80, que yera un momentu mui diferente al d’agora. Nun yera tan fácil tocar ellí. Considérome un privilexáu nesi sentíu.

Préstame un An dro tantu o más qu’El Pericote. Les Fest Noz son imprescindibles na so hestoria, equí tenemos daqué asemeyao agora: Les nueches en danza. Gracies a xente como’l collaciu Xosé Ambás (otru namoráu de la breizh musik) y munchos collacios qu’arimen el llombu.

¿Qué otres influyencies tien la vuesa música?
Fontoria tien munchísimes musicales, Rock sinfónicu, Jazz, barroco, neoclásicu, bufff…munches, daveres. Nel mio casu dende David Bedford pasando per Pentangle, Bach, John Dowland… Alterno el sieglu XX col XVI con muncha facilidá. D’Asturies sigo quedándome colos inmortales, atemporales y míticos Beleño, y sigo de cerca a grupos que me sorprendieron pa mui bien, como por exemplu D’Urria, que me paecen xeniales, o’l proyeutu L-R, cenciellamente acoyonantes. La noche más larga, Voodoo Grass, grupos colos qu’interactuamos siendo caún d’un palu diferente pero de los que pues deprender munchísimo. Hai que dir más p’allá, evolucionar, ye la forma d’enganchar a la xente más nuevo. Dempués ellos ya s’encarguen de buscar nos oríxenes. Evolucionar, pero con cuidáu, nun val too…

¿Qué vamos atopar en “Nordés”, el vuesu primer discu?Nordés ye un discu raru, nun sé, va prestar a xente de la mio xeneración, eso ta claro, pero la xente más nuevo va esfrutalu tamién. Nun ye un discu de música tradicional asturiana, ye un viaxe musical onde van poder apreciase mui bien les influyencies de Fontoria. El títulu, Nordés, xuega col nome del aire, que despexa los cielos, y tamién col puntu xeográficu. Breizh ta mui metía nel discu, pero llugares como’l centru Europa o’l Piamonte Italianu tamién. El día 20 sal a la venta, en tiendes físiques y plataformes dixitales. Amás vamos facer la presentación en Valles-Bocanegra, un  llugar magníficu y conocíu yá a nivel mundial. Nun principiu díbemos presentar nel teatru Filarmónica d’Uvieu, pero contactó conmigo la asociación Bocanegra y decidí que yera’l llugar.

Entames una montonera d’actividas en Piloña, ¿cómo ye l’acoyida, hai sofitu popular ya institucional?
Faigo coses en Piloña, faigo coses fuera… El sofitu qu’atopo ye’l de llocales, xente que cede espacios y que te sofiten en tolo que pueden y más. L’añu pasau entamé la Nueche de San Xuan en Noreña, en collaboración col Conceyu. Foi increyible, prestóme muncho’l resultau y la xente quedó contento. Creo sinceramente que nel consistoriu de Piloña habría crease una comisión permanente (lloñe d’idegues polítiques) y conformada por xente del mediu, xente que ta bregando nel mediu cultural tolos díes.

Pienso que sedría una bona idega de collaboración permanente cola estaya de cultura de la llocalidá, ya insisto, seya la del gobiernu que seya. La cultura en cuantes se politiza, va a la mierda, asina de claro. Tien de tar mui penriba de los colores políticos. Si nun ye asina, pudiera paecer qu’esistiera un “caciquismu cultural” onde siempres apaecieren los mesmos, y eso, d’ocurrir, nun acaba trayendo nada bono. Pol llabor que realizo, piso munches conceyalíes de cultura, dientro y fuera d’Asturies. Deprendes munchísimes coses, y saques dalguna qu’otra bona idega.

¿Qué falta n’Asturies pa promocionar la cultura propia?
¡La entruga del millón! Mira, fai falta que les instituciones polítiques dexen de pasar de lo suyo, dexen de pensar que lo nueso nun val pa nada y dexen de tener puestos los güeyos fuera d’Asturies. Mira, paezme una puta vergoña que nel últimu FITUR, la xente (y refiérome a xente que diba en representación de conceyos asturianos) tuvieren que ver como repartíen la sidra en copes y bandexes, ensin escanciar. Quieren un turismu de calidá, ensin infraestructures, que la xente conoza’l yá tan famosu “Paraísu Natural” pero ensin moñiques de vaca, piles de cuchu, y motores de tractores.

Quieren facer un parque temáticu a la midida de los visitantes. La nuesa cultura, nun ye la que-yos convenga a ellos, ye la que tenemos. ¿Que ye lo que falta daveres? Un gobiernu asturianu que mire polos asturianos, non que namás tengan puestu’l güeyu en Madrid.

Acabes d’asoleyar “Cuentinos d’Areñes, ¿qué va atopar el llector nesti llibru?
Toi percontentu col llibrín, la verdá. Munches presentaciones, una bona acoyida… La xente va atopar fábules actuales cuntaes como les d’antaño. Ye una crítica social, política y cultural mui bien camuflada. Amás, les ilustraciones de Maitetxu Isla, la mio compañera, ayuden a viaxar a la infancia  de munchos de nós.

¿Qué proyectos de futuru tienes?
Proyectos munchos. Mira, yá toi pensando nel próximu discu de Fontoria (de fechu tengo grabada yá la maqueta), van ser 40 minutos d’instrumental basaos na hestoria de la mio bisgüela paterna, y tengo tamién en marcha un discu en solitariu. Entamaré con “Lloréu” que ye un proyeutu perguapu al 50% con Rita María, vigulín de Fontoria.

Charres pelos colexos faciendo demostraciones colos instrumentos tradicionales (y non tradicionales)
Tamién toi con otru tomu de Cuentinos dende Areñes y otru llibru, esta vegada en castellán y que lleva por títulu “Como NO hacer amigos en un mes y no parecer un marginado”. Tengo una collaboración col collaciu Quique Carballeira pa un proyeutu maraviyosu que va facer, y tamien toi terminando de componer la parte musical del nuevu proyectu de la mio querida Susana Sela, cola que voi de xira como “Nenyuri”. Más presentaciones del llibru y conciertos, munchos conciertos…

Tags: