CONOCER ASTURIES CON… MARISA VALLE ROSO

Lleva un añu enllenu d’ésitos. Con discu nuevu sacáu a finales de 2017 la so xira promocional vien teniendo bien d’ésitu dientro y fuera d’Asturies, llegando a convertise nel mes de payares n’Asturiana del mes del diariu con más tirada d’Asturies. Con ella siguimos conociendo Asturies y les coses que más-y presten del país.

Un llugar pa perdese una fin de selmana… Ún de los mios favoritos “Les Caseríes”, en Parres. Na zona hay munchos pueblinos preciosos nos que perdese.

Un llugar pa vivir… Nel mio pueblu, La Felguera (Llangréu), pa mi nun lu hai meyor.

Un platu… Pónesmelo difícil, gústame cuasi too, esfruto comiendo. Por dicir unu… tortos con picadiellu al cabrales.

Un postre… Frixuelos con chicolate y nata.

Una sablera pa pasar el día… La de Ribeseya, ye na que más tiempu pasé de neña.

Un pueblín que nun podemos dexar de ver… El Rebol.lar (Degaña)

Un chigre pa tomar unos culinos… Sidrería El Descanso en La Felguera, bona sidra y bon tratu. Recomiéndola (y les empanadielles arxentines que faen tamién)

Un parque natural pa visitar… Redes.

Una fiesta a la que nun faltar… Cualesquiera na qu’heba bona música y bona compañía. El descensu folclóricu del Nalón ye de les mios preferíes.

Un muséu pa recomendar… El Muséu del Pueblu d’Asturies en Xixón.

Un momentu de la hestoria que te prestaría vivir… Prestaríame tener visto dende la primer fila a grandes cantantes asturianos a los qu’almiro, como “El Presi”, “La Busdonga”, “Orestes Menéndez”…

Un baille pa pasalo bien… El boleru.

Una pallabra n’asturianu que te preste… ¡Préstame!.

Una tradición que nun pue perdese… Echar la sidra, ye un arte.

Tags: