N’apenes dos meses van empezar les celebraciones de los primeros cien años del Teatru Palacio Valdés, y la programación conmemorativa empieza a desvelar los sos primeros finxos, como l’actuación de Marisa Valle Roso, que va cerrar el sábadu 15 de febreru, a les 20 hores, dos años d’esitosa xira por toa España col so discu Consciente.

Cola mirada ancha, la conceyalía de Cultura proxecta un centenariu del Palaciu Valdés qu’avere a Avilés espectáculos capaces d’atraer a los públicos más diversos y esixentes, en propuestes nunca antes vistes na ciudá. Valle cumple dafechu la primer premisa, y nun ye una novedá, cuidao que fai daqué menos d’un añu, n’avientu de 2018, participó na Casa de Cultura nun recital contra la violencia machista.

Les entraes pal conciertu van ponese a la vienta’l llunes 4 de payares

Cantante comprometida, col corazón nel raigañu de la so tierra, nel cantar asturianu qu’aprendió de la mano d’un maestru como Alfredo Canga (ganó más de 30 concursos de tonada, a les sos 31 años), una mano na tradición iberoamericana, y l’alma nel presente, n’abrir nueves puertes que la llevaron con ésitu por tola xeografía española. Marisa Valle Roso escoyó rematar la so xira nuna cortil única.

Mientres los dos años de carretera con Consciente, tuvo acompañada por grandes amigos y amigues artistes, que se xunieron a ella nel escenariu. Y van volver a faer nel Teatru Palacio Valdés, nuna caxa de sorpreses que se va abrir adulces hasta que llegue la cita del 15 de febreru.

Les entraes pal conciertu van poner a la vienta’l llunes 4 de payares, nos calces habituales, de la Casa de Cultura, los caxeros Liberbank, el númberu de teléfonu 902 106 601, la páxina web https://entraes.liberbank.es/palaciovaldes y la mesma páxina de la cantante nacida en Llangréu, www.marisavalleroso.com.