Luis Piedrahita torna al Teatru de la Llaboral

Un pensáu para "xente esixente, aseada y con sentíu del humor"
Luis Piedrahita torna al Teatru de la Llaboral. / Llaboral

Luis Piedrahita torna al Teatru de la Llaboral esti sábadu 8 de xunu, a les 20:30 hores, col show ‘Las amígdalas de mis amígdalas son mis amígdalas‘. D’esti espectáculu díxose que ye una de les obres más atélites, brilloses y poétiques del sieglu XXI, anque quier despintase que foi’l mesmu Piedrahita quien lo dixo. Nesti monólogu, pensáu para «xente esixente, aseada y con sentíu del humor», cavilga sobro esponxes de bañu, neveres, ascensores o hoteles, buscando un paralelismu al traviés del humor ente estes temes y l’alma humana.

Luis Piedrahita ye humorista, ilusionista, escritor y director de cine. Collaborador y guionista del programa ‘El formigueru 3.0′, tamién trabayó n’El club de la comedia’ y en ‘Nada por aquí’. Escribió y dirixió el llargumetraxe ‘La habitación de Fermat’ xuntu a Rodrigo Sopeña. Ye autor de best sellers d’humor como ‘El castellano es un idioma loable lo hable quien lo hable’ y ‘¿Por qué los mayores construyen los columpios siempre encima de un charco?’. Amás del llibru de lliteratura infantil ‘Diario de una pulga’ y de otru de maxa, ‘Monedas y otras historias’. Recibió’l premiu Performing Fellowship 2017 de l’Academia de les Artes Máxiques de Hollywood y la prestixosa Grolla d´Oru en 2019, que reconoz el llabor artísticu de personalidaes internacionales rellacionaes col mundu del cine, la televisión y la maxa.

Les localidaes pa esfruta de ‘Las amígdalas de mis amígdalas son mis amígdalas’ tan yá a la venta a un preciu de 15 euros. Pueden adquirise na Recepción de la Llaboral, nel Centru Niemeyer n’Avilés, na Oficina d’Información Turística d’Asturies n’Uviéu, na web entraes.liberbank.es, nel teléfonu 902 106 601 y na rede de caxeros Liberbank.