Los sidros y les comedies y el corri-corri yá son Bien d’Interés Cultural

El Gobiernu asturianu alcuerda la protección de dambes manifestaciones, que representen tradiciones bien singulares de la cultura popular
Los sidros y comedies de Valdesoto, Bien d'Interés Cultural. / Daniel Rodríguez

Los sidros y les comedies de Valdesoto y la danza cabraliega del corri-corri yá son Bien d’Interés Cultural. El Gobiernu asturianu aprobó güei la protección d’estes dos manifestaciones que constitúin tradiciones bien singulares de la cultura popular asturiana.

Los sidros y les comedies  de Valdesoto son una amuesa del llargu ciclu del antroxu. Trátase d’una mazcarada d’iviernu que consiste na marcha de los sidros peles cais de la parroquia. Van vistíos con pantalones y camisa blancos, con una faxa colorada de la que cuelguen cuatro llueques y coles melenes na cabeza –un cucuruchu de piel d’oveya rematáu por un rabu de foín-. Asina afatiaos piden l’aguilandu a la cabeza d’un cortexu que representa les comedies, escenes costumbristes con referencies a l’actualidá. Nelles participen, amás de los sidros, representaciones del vieyu y la vieya, les dames, los comerciantes, policías y un ciegu o un diañu. Dende empiezos d’esti sieglu, la tradición de los sidros y les comedies foi recuperada en Valdesoto gracies al llabor de la sociedá El Cencerru, que llogró da-y un nuevu impulsu tres años d’olvidu.

Estes dos manifestaciones constitúin tradiciones bien singulares de la cultura popular asturiana

El corri-corri ye un baille de singular guapura, distintu a cualesquier otru asturianu o español, que foi escoyíu en numberoses ocasiones para representar el conxuntu de dances del Principáu. Dende’l puntu de vista etnolóxicu, ye una relevante espresión de la cultura popular venceyada a una manera de vida. Asina, el baille pasó por delles coxuntures sociales y polítiques, siempres con gran sofitu social. El corri-corri, como manifestación cultural, precisa d’elementos materiales dotaos de valor propiu, como los traxes d’aldeana cabraliega y de cabraliegu o bailín; la música y cantar o los instrumentos (tambor y pandorios). Tou esi conxuntu permite apreciar el calter singular d’esti bien patrimonial.

Tags: